Դեկտեմբերի 20-ից 26-ն ԱԻՆ ՓԾ ճգնաժամային կառավարման ազգային կենտրոնում գրանցվել է 434 դեպք, որից 150-ը՝ արտակարգ, այդ թվում՝ 73 հրդեհի, 1 պայթյունի, 12 ինքնասպանության փորձի դեպք, 56 ճանապարհատրանսպորտային պատահար, ինչպես նաև՝ 166 կենցաղային կանչ. տուժել է 101 մարդ, իսկ փրկարարական օպերատիվ գործողությունների արդյունքում փրկվել է 7 քաղաքացի: Նախորդ շաբաթվա ընթացքում ընդհանուր գրանցվել է 12 մահ:
Արձանագրվել է թունավորման 8 դեպք:
Եղանակային պայմաններով և այլ գործոններով պայմանավորված գրանցվել է տրանսպորտային միջոցների արգելափակման 57 դեպք: Փրկարարներն օգնություն են ցուցաբերել 468 քաղաքացու և անվտանգ տարածք տեղափոխել ավտոճանապարհներին արգելափակված 335 տրանսպորտային միջոց:
ՀՀ ԱԻ նախարարությունը հորդորում է թե՛ կենցաղում, թե՛ ճանապարհներին լինել զգոն և խստորեն պահպանել անվտանգության կանոնները:
Արտակարգ իրավիճակների նախարարության Փրկարար ծառայությունն այսօր՝ դեկտեմբերի 27-ին, ամփոփել է մեկ ամսվա ընթացքում կատարված աշխատանքները: Դեկտեմբերի 1-ից 27-ը Ճգնաժամային կառավարման ազգային կենտրոնի 911 ահազանգման կենտրոնում սպասարկվել է 49500 զանգ, նախորդ տարվա նույն ժամանակահատվածում` 48636: Հանրապետությունում գրանցվել է 701 արտակարգ դեպք և պատահար: ՀՀ ավտոճանապարհներին ձնաբքի ժամանակ մարդկանց և տրանսպորտային միջոցներն անվտանգ տարածք տեղափոխելու և առաջին օգնություն ցուցաբերելու նպատակով Արագածոտնի, Գեղարքունիքի, Վայոց ձորի, Շիրակի և Սյունիքի մարզերում ծավալված առաջնային օգնության կետերի կողմից արձանագրվել է 42 դեպք, որի արդյունքում արգելափակումից դուրս է բերվել 102 ավտոմեքենա, 198 քաղաքացու ցուցաբերվել է օգնություն: Շուռնուխ բնակավայրում ծավալված ժամանակավոր հենակետում շարունակվում է շուրջօրյա հերթապահություն: Սյունիքի մարզային փրկարարական վարչությանը տրամադրվել է «POLARIS GNE-20» ամենագնաց:
Համաձայն Փրկարար ծառայության տնօրեն, փ/ծ գնդապետ Արմեն Գասպարյանի զեկույցի՝ ԱՄՆ պաշտպանության դեպարտամենտի վտանգների նվազեցման գործակալության կողմից իրականացվող Քիմիական, կենսաբանական, ճառագայթային և միջուկային անվտանգության ոլորտում համագործակցության ծրագրի շրջանակում ԱԻՆ-ը ստացվել է 5 կոնտեյներ քիմիական, կենսաբանական, ճառագայթային և միջուկային մոնիթորինգի և վարակազերծման գույք: 2022թ. փետրվարին տեղի կունենա գույքի պաշտոնական հանձնումը, որից հետո կմեկնարկեն դասընթացները գույքի շահագործման և պահպանման թեմաներով:
Մարզային փրկարարական վարչությունների ղեկավարներն ընդգծել են անցած մեկ տարվա ընթացքում կրթական և հանրային կառույցներում անցկացված ուսումնավարժանքների արդյունավետությունը՝ հանրային իրազեկվածության բարձրացման առումով: ԱԻ նախարար Անդրանիկ Փիլոյանը հանձնարարել է հաջորդ տարի ևս շարունակել «Ազդարարում, տարահանում, պատսպարում» թեմայով վարժանքները, ինչպես նաև շնորհակալություն է հայտնել փրկարար ծառայողներին՝ ամբողջ տարվա ընթացքում պատշաճ մակարդակով իրականացրած ծառայության համար: Խորհրդակցության ավարտին նախարարը մի շարք ծառայողների հանձնել է առաջին և հերթական սպայական կոչումները՝ անձնվիրաբար ծառայելու պատրաստակամություն մաղթելով: