Փետրվարի 21-ին Էդուարդ Աղաջանյանի նախագահությամբ արտահերթ նիստ է գումարել ՀՀ ԱԺ արտաքին հարաբերությունների մշտական հանձնաժողովը:
Պատգամավոր Անդրանիկ Թեւանյանի ներկայացմամբ քննարկվել է «Հայաստան» խմբակցության հեղինակած «Ադրբեջանի եւ Թուրքիայի խորհրդարանների կողմից «Շուշիի հռչակագրի» վավերացման կապակցությամբ» ՀՀ ԱԺ հայտարարության նախագիծը: Փաստաթղթի ամբողջական տեքստը՝ այստեղ:
«Եթե մենք չենք արձագանքում այդ փաստաթղթին, նշանակում է մենք ընդունում ենք Շուշիի հռչակագիրը»,- ասել է պատգամավորը:
Նշվել է, որ հայտարարությունն ուղերձ կլինի ՀՀ քաղաքացիներին, աշխարհասփյուռ հայությանը, միջազգային հանրությանը, որ անվտանգային հարցերում ՀՀ-ն ունի կարմիր գծեր եւ չի նահանջելու դրանցից:
Գուրգեն Արսենյանը ներկայացրել է նախագծի վերաբերյալ ԱԺ «Քաղաքացիական պայմանագիր» խմբակցության տեսակետը: Նա նշել է, որ խմբակցության պատգամավորները չեն միանա «Հայաստան» խմբակցության առաջարկին՝ հետեւյալ հիմնավորումներով:
«Դեռեւս ութ ամիս առաջ՝ 2021թ. հունիսի 15-ին եւ 17-ին, ՀՀ ԱԳՆ-ն անդրադարձել է խնդրին՝ հրապարակային հայտարարության եւ մեկնաբանությունների տեսքով: Հիմնավորումն առ այն, թե ՀՀ-ն պետք է Ազգային ժողովի նույնաբովանդակ հայտարարության տեսքով արձագանքի այդ հռչակագրի վավերացմանը, տրամաբանական չէ, քանի որ ՀՀ խորհրդարանը եւ ԱԳՆ-ն վարում են եւ պետք է վարեն միասնական արտաքին քաղաքականություն»,- ասել է Գուրգեն Արսենյանը:
Վերջինս ընդգծել է, որ խորհրդարանական դիվանագիտության գործիքակազմը չի սկսվում եւ չի ավարտվում ԱԺ հայտարարություններով. այն իրականում ավելի լայն է:
Այդ համատեքստում պատգամավորը նշել է, որ «Քաղաքացիական պայմանագիր» խմբակցության համար ողջունելի է ԱԺ «Հայաստան» խմբակցության միայն այն հայտարարությունը, որը վերաբերում է միջազգային կառույցներում աշխատանքների վերսկսմանը:
«Մենք հորդորում ենք առավել ակտիվ ներգրավվել ՀՀ շահերի պաշտպանության գործում միջազգային բոլոր հարթակներում»,-նշել է Գուրգեն Արսենյանը:
Նախագիծը չի արժանացել հանձնաժողովի հավանությանը: