ՀՀ Վարչապետ Նիկոլ Փաշինյանին ուղղված «գործ տալու» ինստիտուտի ձևավորման մանիպուլյատիվ և ահնիմն մեղադրանքները չեն դադարում: Քանի ուշ չէ, պետք է հստակ գիտակցվի, որ ոստիկանը մերն է և ոստիկանությունը չպիտի դիտարկվի և ընկալվի որպես «գլխին սարքող» մարմին, իսկ ոստիկանին դիմողը՝ «գործ տվող»:
Հենց ոստիկանությունն է լիազորված զբաղվել օրինախախտումներով: Այդ համակարգը փաստացիորեն գործում է հարկատուների կողմից կատարվող հարկերից գոյացած գումարի հաշվին և ցանկացած իրավագիտակից ու օրինապաշտ քաղաքացի հասկանում է մի պարզ բան՝ անհրաժեշտության դեպքում ոստիկանություն դիմելը կամ օրենքի խախտում արձանագրելն ու դրան արձագանք տալը դա նորմալ երևույթ է:
Ամբողջ Եվրոպայում, ԱՄՆ-ում, ցանկացած այլ ոչ հետխորհդրային երկրներում հանրային վերահսկողության ինստիտուտը մեծ տարածում ունի: Դուք երբեք չեք կարողանա իր հարկերի հաշվին ոստիկանություն պահող ամերիկացուն կամ եվրոպացուն բացատրել, թե ինչու՞ նա անհրաժեշտության կամ կարիքի դեպքում չպետք է դիմի ոստիկանությանը: Շատերը կհիշեն, թե խորհրդային Հայաստանում սովորական քաղաքացիների կողմից ինչպես էր ընկալվում հանրային վերահսկողություն ասվածը՝ ոստիկանությանը դիմողը «գործ տվող» էր:
Գանք մեր իրականություն: Երբ քաղաքացու աչքի առաջ տեղի է ունենում օրենքի որևէ խախտում, օրինակ ինչ-որ մարդու մեքենան են թալանում, ծեծկռտուք է, կամ ավելի պարզ օրինակ, երբ տարիքով մարդիկ բակի զրուցարանում նստած նարդի են խաղում, անտեսելով հակահամաճարակային բոլոր կանոնները և երբ քաղաքացին նկատելով նման դեպքերը ահազանգում է ոստիկանություն, դա իրավագիտակից և օրինապաշտ քաղաքացու վարքագիծ է, այլ ոչ թե «գործ տալ»:
Ինչքան շուտ մարդիկ հասկանան և գիտակցեն այս պարզագույն ճշմարտութունը, այդքան լավ բոլորիս համար: Իսկ երբ մարդը կեղծ ցուցմունք է տալիս, թե իր հարևանը իրեն 7 հոգով ծեծել է, կամ օրինակ քաղաքացին կողոպտում է սեփական բնակարանը, կոտրում սեփական մեքենայի ապակին և մեղքը գցում հարևանի վրա, հենց դա է «գլխին սարքելն» ու «գործ տալը»: Առողջ եղեք, կրեք դիմակ, պահպանեք սոցիալական հեռավորություն, փրկեք կյանքեր: