Հոկտեմբերի 8-9-ին Երեւանում՝ Կարեն Դեմիրճյանի անվան մարզահամերգային համալիրում կանցկացվի Եվրասիական միջկառավարական խորհրդի նիստ:
ՀԺ-ի հարցին, թե ո՞ր երկրներն են հաստատել սպասվող նիստին իրենց մասնակցությունը՝ ՀՀ արտաքին գործերի նախարարությունից պատասխանել են, որ սեպտեմբերի 9-ին ստացվել է պաշտոնական տեղեկատվություն առ այն, որ ԵԱՏՄ բոլոր անդամ պետությունները համաձայնեցրել են Եվրասիական միջկառավարական խորհրդի հերթական նիստը՝ ս.թ. հոկտեմբերի 8-9-ը Երեւանում անցկացնելու հայկական կողմի առաջարկը:
Ինչ վերաբերում է ԵԱՏՄ անդամ երկրների վարչապետների մասնակցությամբ նիստի օրակարգին՝ այս կապակցությամբ արտաքին գերատեսչությունից չեն շտապում տեղեկատվություն հրապարակել.
«Ս.թ. հոկտեմբերի 8-9-ը Երեւանում կայանալիք Եվրասիական միջկառավարական խորհրդի նիստի օրակարգի նախագիծը այս պահի դրությամբ գտնվում է լրամշակման եւ համաձայնեցման փուլում։ Վերոնշյալ օրակարգի վերջնական հաստատումը նախատեսված է ս․թ․ հոկտեմբերի 1-ին կայանալիք ԵԱՏՀ խորհրդի նիստին»։
Սպասվում է, որ օրակարգի հարցերից մեկը կլինի Հայաստանի հետ օդային հաղորդակցության վերականգնման հարցը: Հիշեցնենք, որ փոխվարչապետ Մհեր Գրիգորյանը սեպտեմբերի 16-ին ԱԺ–ում հայտարարել էր, որ նիստում նախատեսվում է քննարկել նաեւ անդամ երկրների միջեւ կանոնավոր ուղեւորափոխադրումների վերականգնման հարցը։ Ինչպես հայտնի է՝ Ռուսաստանը սեպտեմբերի 21-ից վերսկսել է ավիահաղորդակցությունը ԵԱՏՄ անդամ երկրներից Ղազախստանի, Ղրղզստանի եւ Բելառուսի հետ, իսկ Հայաստանի քաղաքացիների առջեւ օդային սահմանը փակ է մնում:
