Սեպտեմբերի 23-ին «Այբ» կրթական հիմնադրամն իր գործընկեր կազմակերպությունների հետ ՀՀ ԱԺ գիտության, կրթության, մշակույթի, սփյուռքի եւ երիտասարդության հարցերի մշտական հանձնաժողովում ներկայացրեց ՄԱԿ-ի «Նոր Հայաստան, ժամանակակից խորհրդարան» ծրագրի շրջանակում իրականացված հետազոտությունների արդյունքները:
«Այբ» կրթական հիմնադրամի գործադիր տնօրեն Սոնա Կոշեցյանի ներկայացմամբ՝ հետազոտության աշխատանքներն իրականացվել են երկու ամսում: Ըստ ոլորտների ուսումնասիրվել են իրավական կարգավորումները, միջազգային փորձը: Կազմակերպվել են հանդիպում-քննարկումներ պատասխանատու պետական մարմինների, կրթության ոլորտում քաղաքականության իրականացմանը մասնակցող պետական ոչ առեւտրային կազմակերպությունների ու հիմնադրամների հետ: Հետազոտության առանցքում չորս ընդգրկուն թեմաներ են:
Առաջին թեման վերաբերում է ուսուցիչ աշխատելու իրավունք տալու եւ թափուր տեղը համալրելու ընթացակարգերի բարելավմանը: Ըստ ուսումնասիրության՝ գործող ընթացակարգերը շատ դեպքերում սահմանափակում են որակյալ կադրեր ներգրավելու հնարավորությունը, խնդիրներ են առաջանում հատկապես բնագիտական առարկաների եւ օտար լեզուների ուսուցիչների թափուր հաստիքները համալրելիս:
Երկրորդ թեման վերաբերում է հեռավար կրթությանը: Փորձագետների դիտարկմամբ՝ հեռավար կրթության փորձը հիմնականում պայմանավորված է համավարակով, երբ ուսումնական հաստատությունները հապճեպ՝ առանց պատշաճ նախապատրաստվելու, անցան հեռավար կրթության: Հարցմամբ արձանագրվել են տեխնիկական բնույթի, ՏՀՏ գրագիտությանը, մեթոդաբանությանը վերաբերող մի շարք խնդիրներ:
Ոչ ֆորմալ կրթության, արտադպրոցական դաստիարակության հիմնախնդիրները եւ օրենսդրական կարգավորման առաջնահերթությունները եւս եղել են փորձագետների հետազոտության առանցքում: Առկա ենթաօրենսդրական կարգավորումների գնահատմամբ՝ հայտնաբերվել են մի շարք իրավական խնդիրներ, որոնց վերաբերյալ փորձագետները ներկայացրել են իրենց դիտարկումներն ու առաջարկությունները:
Հետազոտության չորրորդ թեման վերաբերում է «Մշակութային օրենսդրության հիմունքների մասին» օրենքին եւ դրանից բխող իրավահարաբերություններին: Ուսումնասիրության ընթացքում անդրադարձ է կատարվել մշակույթի բնագավառում քաղաքականության ձեւավորման իրավական կարգավորումներին, մշակույթի գործիչների եւ միությունների իրավական կարգավիճակին, շարունակական մասնագիտական զարգացմանը:
Հանձնաժողովականները կարեւորեցին եւ բարձր գնահատեցին կատարված ծավալուն աշխատանքը:
