Հունվարի 27-ին ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը հանդիպել է լրատվամիջոցների ներկայացուցիչներին՝ անդրադառնալու նրանց հետաքրքրող հարցադրումներին: Հանձնաժողովի նախագահը խոսել է ներքին եւ արտաքին քաղաքական օրակարգի հարցերի վերաբերյալ:
Անդրադարձ է եղել Ռուսաստանին, ապա Ադրբեջանին հայկական կողմից արված առաջարկների փաթեթի վերաբերյալ հարցին:
«Այն առաջարկները, որոնք ներկայացվել են մեր գործընկերներին, ամենեւին նախապայմաններ չեն: Մենք բազմիցս նշել ենք, որպեսզի սահմանագծման եւ սահմանազատման գործընթացը գործնականում հնարավոր լինի իրականացնել, անհրաժեշտ է ապահովել նվազագույն անվտանգային պայմաններ»,-կարծիք է հայտնել Էդուարդ Աղաջանյանը: Նրա խոսքով՝ ՀՀ առաջարկն ուղղված էր նշված երաշխիքների ապահովմանը:
«5-րդ ալիք» հեռուստաընկերության թղթակիցը փոխլրացնող հարց է տվել՝ նշելով, որ Բաքուն մերժում է առաջարկների փաթեթը, որի հիմքում զորքերի հայելային հետքաշման պահանջն է: «Կարելի՞ է ենթադրել, որ հայելային հետքաշման պահանջը որպես առաջարկ այլեւս չի քննարկվում երկու կողմից էլ»,-հետաքրքրվել է նա:
Էդուարդ Աղաջանյանի գնահատմամբ՝ նման ենթադրություն եւ հետեւություն անել չի կարելի, ՀՀ-ն այս առաջարկից որեւէ պարագայում չի հրաժարվում եւ լավագույն տարբերակն առաջին քայլ կամ նախադրյալ նման գործընթաց սկսելու՝ հայելային հետքաշումն է:
Անդրադարձ է եղել Հայաստանի արտաքին քաղաքականությանը, հայ-ռուսական հարաբերություններին:
«Հայաստանի Հանրապետությունն իր արտաքին քաղաքականությունը, դրա ուղղությունները եւ բալանսավորումը պայմանավորում է առաջին հերթին եւ միայն ՀՀ շահերով: ՌԴ ՀՀ ռազմավարական գործընկերն է»,-ասել է Էդուարդ Աղաջանյանը եւ հավելել, որ մասնավորապես 44-օրյա պատերազմից հետո ՀՀ անվտանգային ճարտարապետության հարցում Ռուսաստանն ունի առանցքային կարեւորություն:
«Առավոտ» օրաթերթի լրագրողի հարցին ի պատասխան, որը վերաբերում էր Հայոց ցեղասպանության միջազգային ճանաչմանը, Էդուարդ Աղաջանյանը նշել է, որ նորանկախ Հայաստանի պատմության ընթացքում ՀՀ բոլոր իշխանությունները կողմնակից են եղել Թուրքիայի հետ հարաբերությունների կարգավորմանը՝ առանց նախապայմանների:
Լրագրողը նաեւ հետաքրքրվել է ՀՀ վարչապետ Նիկոլ Փաշինյանի՝ առցանց ասուլիսում հայտնած այն տեղեկությամբ, ըստ որի՝ Հայաստանը պատրաստ է Ադրբեջանի հետ խաղաղության պայմանագիր ստորագրելու բանակցություններին: Լրագրողը նաեւ հետաքրքրվել է, թե ի՞նչ է ներառվելու այդ պայմանագրում:
Էդուարդ Աղաջանյանը նշել է, որ Հայաստանի Հանրապետությունը տարածաշրջանում խաղաղության օրակարգի առաջմղման վերաբերյալ իր դրական վերաբերմունքի մասին մշտապես հայտարարել է, որի վերջնական նպատակը խաղաղության պայմանագիրն է: Ըստ նրա՝ այն երկար եւ համապարփակ քննարկման արդյունքում, երկկողմանիորեն ընդունելի տրամաբանությամբ պետք է հրապարակվի եւ հասանելի լինի Հայաստանի ու Ադրբեջանի հանրություններին:
