Մեկնարկել են «Հայաստանի Հանրապետության վարչատարածքային բաժանման մասին» օրենքում փոփոխություններ եւ լրացումներ կատարելու մասին» ՀՀ օրենքի նախագծի եւ կից օրենսդրական փոփոխությունների փաթեթի վերաբերյալ խորհրդարանական լսումները:
ՀՀ ՏԿԵ նախարարի տեղակալ Վաչե Տերտերյանը ԱԺ ամբիոնից հայտարարեց, որ համայնքների միավորմանը կամ երկրի վարչատարածքային կառուցվածքին պետք է նայել ոչ թե դոգմատիկ, այլ որպես դինամիկ փոփոխվող պրոցեսի՝ կախված երկրի առջև ծառացած մարտահրավերներից, տնտեսական զարգացման, ստրատեգիական ուղղություններից:
«Վարչատարածքային փոփոխությունները կատարում ենք հատկապես դեպի համայնքներ իշխանական լիազորությունների ապակենտրոնացում իրականացնելու նպատակով: Առաջարկվող վարչատարածքային փոփոխություններով կունենանք վարչատարածքային բաժանման մի սխեմա ՀՀ-ում, երբ կլինեն 78 համայնքներ, որոնցից 71-ը կլինեն միավորված:
Չմիավորված համայնքներից կլինեն Երևանը, Գյումրին, ևս 5-ը ազգային փոքրամասնություններով կամ նրանց հետ բնակեցված համայնքներն են»,- ասաց Վաչե Տերտերյանը:
«Համայնքների խոշորացման և միջհամայնքային միավորումներ ստեղծելու հայեցակարգը մեր երկրում ընդունվել է 2011 թվականին, որից հետո՝ 2016 թվականին, Կառավարության նախաձեռնությամբ, սկսվել է օրենքի կիրառումը: Առաջին փուլում ՀՀ 486 համայնքներ միավորվել են՝ դառնալով 54 խոշորացված համայնքներ: Օրենքի նախագիծը, որը Կառավարության կողմից շրջանառության մեջ է դրվել, նախատեսում է ՀՀ 441 համայնքները միավորել և դարձնել 37 խոշորացված համայնք»,- ասաց ԱԺ տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նախագահ Վահե Ղալումյանը:
Ղալումյանը համայնքների խոշորացումը բնութագրեց որպես դրական գործընթաց:
«Տավուշի մարզի Բերդ, Դիլիջան խոշորացված համայնքների օրինակներն ուսումնասիրելով՝ ակնհայտ է, որ խոշորացված համայնքներն առավել արդյունավետ են կարողանում ծախսել իրենց միջոցները»,- նշեց Ղալումյանը:
