Հայաստանն ու Սլովակիան նախատեսում են զարգացնել համագործակցությունը մի շարք ոլորտներում: Հայաստանում գտնվող Սլովակիայի ԱԳ նախարար Իվան Կորչոկի հետ հանդիպմանը ՀՀ ԱԳ նախարար Արարատ Միրզոյանը քննարկել է երկկողմ հարաբերություններին վերաբերող հարցեր, անդրադարձ է կատարվել տնտեսության տարբեր ճյուղերում համագործակցության առկա ներուժն իրագործելու ուղիները:
«Մեր երկու երկրների միջև հարաբերությունները զարգացել են բոլոր ուղղություններով, և մենք այսօր վերահաստատեցինք այն, որ պետք է գործադրենք ջանքեր այդ հարաբերություններն ավելի սերտացնելու համար: Սա վերաբերում է առաջին հերթին քաղաքական երկխոսությանը: Մենք ունենք բարձր մակարդակով տարվող քաղաքական երկխոսություն, և այդ երկխոսությունը վերաբերում է ինչպես երկկողմ, այնպես էլ բազմակողմ հարաբերություններին: Խոսեցինք նաև տնտեսական հարաբերությունների, հատկապես, դեռ չիրացված առկա ներուժի մասին: Միասնական ջանքեր պետք է գործադրենք էներգետիկայի, տեղեկատվական տեխնոլոգիաների, կանաչ էներգետիկայի զարգացման ուղղությամբ, ինչպես նաև մշակույթի և գիտության ոլորտներում: Ասեմ, որ մոտավոր նախանշել ենք միջոցառումներ, որոնք առաջիկայում կիրականացնենք համատեղ ջանքերով»,- ասաց Արարատ Միրզոյանը:
ՀՀ ԱԳ նախարարը երախտագիտություն հայտնեց Սլովակիային ու Սլովակիայի ժողովրդին ինչպես համաճարակի ընթացքում Հայաստանին ցուցաբերված աջակցության, այնպես էլ արցախյան վերջին պատերազմի օրերին ու դրանից հետո Սլովակիայի որդեգրած դիրքորոշման համար: Դա վերաբերում է ինչպես Սլովակիայի գործադիր իշխանությանը, այնպես էլ Սլովակիայի խորհրդարանի ընդունած բանաձևերին:
Հանդիպմանը հանգամանալից անդրադարձ է կատարվել տարածաշրջանում տեղի ունեցող զարգացումներին: ՀՀ ԱԳ նախարար Արարատ Միրզոյանը լրագրողների հետ հանդիպմանը նշեց, որ խոսել են Արցախի և Արցախի ժողովրդի դեմ Ադրբեջանի կողմից սանձազերծած լայնածավալ ագրեսիայի մասին, անդրադարձ է կատարվել այդ օրերին թույլ տրված հանցագործություններին:
«Խոսել ենք Ադրբեջանի՝ եռակողմ հայտարարության դրույթները չկատարելու մասին: Մասնավորապես, դա վերաբերում է հայ ռազմագերիներին և բռնի պահվող քաղաքացիական անձանց չվերադարձնելուն: Խոսել ենք մշակութային ժառանգության պահպանման հարցերի շուրջ: Անդրադարձել ենք նաև Հայաստան-Ադրբեջան սահմանին տիրող լարվածությանը, Ադրբեջանի սադրիչ գործողություններին, Հայաստանի տարածքներ ներթափանցելուն: Խոսել ենք բոլոր առկա խնդիրները խաղաղ, բանակցությունների ճանապարհով լուծելու մասին, մասնավորապես, ԼՂ-ի հիմնախնդրի շուրջ խաղաղ բանակցությունների շարունակության անհրաժեշտությունը ԵԱՀԿ Մինսկի խմբի համանախագահության շրջանակում»,- ասաց Արարատ Միրզոյանը: