Անհայտ անձինք հարձակվել են Փարիզում Թուրքիայի գլխավոր հյուպատոսության վրա, տուժածներ չկան։ Ինչպես հատտնում է ՏԱՍՍ-ը, այս մասին հինգշաբթի գրել է Cumhuriyet թերթը։
Թերթի տեղեկություններով՝ դիվանագիտական ներկայացուցչության տարածք են նետվել երկու ինքնաշեն պայթուցիկ սարքեր։ Գլխավոր հյուպատոսության շենքում տեղի ունեցած պայթյունի ժամանակ կոտրվել են ապակիներ, վնասվել են նաև պատերը։ Փարիզի ոստիկանությունը լայնածավալ հետաքննություն է սկսել՝ պայթուցիկի տեսակը պարզելու և հանցագործներին բռնելու համար։ Մինչ օրս ոչ ոք չի ստանձնել հարձակման պատասխանատվությունը։
Ֆրանսիայի ԱԳՆ-ն դատապարտել է Փարիզում Թուրքիայի գլխավոր հյուպատոսության վրա հարձակումը։ Այս մասին ուրբաթ լրագրողներին հայտնել է ԱԳՆ ներկայացուցիչը։
«Մենք խստորեն դատապարտում ենք ագրեսիան, որը իրականացվել է մայիսի 11-ի լույս 12-ի գիշերը Թուրքիայի գլխավոր հյուպատոսության դեմ: Ներքին գործերի և արդարադատության նախարարությունները անմիջապես սկսել են միջադեպի հետաքննությունը»,- ասել է դիվանագետը։
Նրա խոսքով՝ Ֆրանսիայի իշխանությունները մտադիր են ուշադիր հետեւել հետաքննության ընթացքին։ «Մենք հատկապես կարևորում ենք դիվանագիտական առաքելությունների անվտանգությունը։ Թուրքիայի դեսպանատան, ինչպես նաև դեսպանի նստավայրի անվտանգությունն ապահովվում է հատուկ միջոցներով»,- հավելել է Ֆրանսիայի ԱԳՆ խոսնակը։
