Վաշինգտոնում գործող ամերիկյան IRI կազմակերպությունը հրապարակել է Հայաստանում անցկացված կորոնավիրուսի համավարակի խնդրի շուրջ հարցման արդյունքները:

«Արմենպրես»-ի փոխանցմամբ՝ հարցման արդյունքները ցույց են տվել, որ Հայաստանի բնակչության 97%-ը կորոնավիրուսի համավարակից պաշտպանվում է դիմակ կրելով:

Հարցման մասնակիցներն 90% դեպքերում նշել են, որ կորոնավիրուսով չվարակվելու համար խուսափում են հանրային հավաքներից, ևս 90%­ը նշել են, որ չվարակվելու համար սերտ շփումներ չեն ունենում ընտանիքի անդամ չհանդիսացող անձանց հետ: Հարցվածներն 85% դեպքերում նշել են, որ խուսափում են այցելել այնպիսի վայրեր, որտեղ սոցիալական հեռավորություն պահպանել հնարավոր չէ, իսկ 84% դեպքում հայտնել են, որ կորոնավիրուսից պաշտպանվում են ձեռքերը հաճախակի լվանալով:

Առավել քիչ դեպքերում` 2%, հարցվածները կորոնավիրուսից պաշտպանվելու միջոց են նշել ձեռքերի ախտահանիչները, իսկ 1% դեպքում հայտնել են, որ համավարակից պաշտպանվելու միջոց են օգտագործում ակնոցը:

Հարցումն անցկացվել է Հայաստանում, հունիսի 18-25-ը: Հարցմանը մասնակցել է 18 տարեկանից բարձր 1517 ՀՀ քաղաքացի:

Աղբյուր՝ Արմենպրես