Գեղարքունիքի մարզպետ Գնել Սանոսյանը մանրամասներ է ներկայացրել մարզում սահմանային իրավիճակի վերաբերյալ: «Արմենպրես»-ի հետ զրույցում Գնել Սանոսյանը, անդրադառնալով տարածվող տեղեկություններին Գեղարքունիքի մարզի սահմանների ուղղությամբ հակառակորդի կողմից առաջխաղացումների վերաբերյալ, նշեց՝ այն տարածքներում, որոնք 2020 թվականի նոյեմբերի 9-ի եռակողմ հայտարարության համաձայն անցել են Ադրբեջանի վերահսկողության տակ, հակառակորդը պետք է դիրքավորվեր, սակայն չի կարողացել դա անել եղանակային անբարենպաստ պայմանների պատճառով:
«Այս պահին նրանք իրականացնում են դիրքավորման աշխատանքներ: Որոշ կասկածելի հատվածներում ճշգրտումները համաձայնեցվում են հայ դիրքապահների հետ: Իրավիճակը գտնվում է հայկական զինված ուժերի վերահսկողության ներքո»,- ասաց մարզպետը:
ՀԺ հարցին՝ հիմա իրավիճակը հանգի՞ստ է՝ մարզպետը պատասխանեց. «Հանգիստ է, որեւէ այլ արտառոց միջադեպ չկա, մեր զորքերը ամբողջ իրավիճակին տիրապետում են»: Այսինքն՝ խոսք չկա՞ մեր սահմանից ներս մտնելու, առաջ գալու մասին, փորձեցին ճշտել. «Ոչ, մերոնք տեղում են, ամեն ինչ իրենց հսկողության տակ է, բախումներ, կրակոց չեն եղել»:
Մարզպետը հարկ համարեց ընդգծել, որ հակառակորդը առաջ չի եկել.«Մեր տարածք մուտք չեն գործել, առաջ գալու փորձեր չեն եղել։ Ընդամենը պոստերի տեղերն են հստակեցնում, որ սահմանագծով ճիշտ դիրքավորվեն»,-ասաց Սանոսյանը՝ հավելելով, որ հակառակորդը այդ գործողությունները սկսել է իրականացնել այսօր։
