ՀՀ վարչապետ Նիկոլ Փաշինյանը ժամանեց Սյունիքի մարզ: Նրան ուղեկցում են տարածքային կառավարման եւ զարգացման, Էկոնոմիկայի նախարարները: Առաջին կանգառը Սառնակունք գյուղն է: Այնտեղ վարչապետը զրուցեց գյուղի բնակիչների հետ:
Պատասխանելով նրանցից մեկի՝ ճանապարհի անվտանգությանը վերաբերող հարցին՝ Փաշինյանն ասաց. «Հիմա այնպես է ստացվել, որ ճանապարհը սահմանի պռնկով է անցնում: Եվ հիմա մեր սահմանապահներն են տեղակայվում այնտեղ, նաեւ ճանապարհը ռուս սահմանապահներն են պարեկելու եւ ապահովելու, որ ճանապարհը անցանելի եւ անվտանգ լինի: Բայց ինչի՞ համար է այս ամեն ինչը արվում: Էս ամեն ինչը արվում է նրա համար, որպեսզի անվտանգություն ապահովվի, որպեսզի նոր կոնֆլիկտ չբորբոքվի այդ ամեն ինչի շուրջ: Հիմա՝ մինչեւ իրավիճակը կայունանալը, այնտեղ կլինեն առանձին դեպքեր, միջադեպեր եւ այլն, որոնք հետագա աշխատանքի արդյունքում կկարգավորվեն: Ամենակարեւորն այն է, որ մենք ամեն առանձին վերցրած դեպքից խուճապի չմատնվենք եւ իրավիճակը կայունացնենք»:
Հարց հնչեց նաեւ այն մասին, թե ինչքանո՞վ են վստահելի GPS կարգավորումները, որոնց միջոցով սահմաններ են ճշգրտվում: Վարչապետն ասաց, որ մի քանի անգամ է արվում այդ գործընթացը, վերցվում են համընկնումները: Հավաստիացրեց՝ այդ առումով որեւէ խնդիր չկա:
Գյուղացիների հրավերով Փաշինյանը բաժակ բարձրացրեց պատերազմում նահատակվածների զոհերի համար:
«Մեզ՝ ապրողներիս, ցանկանում եմ, որ արժանի լինենք մեր զինվորներին, մեր զավակներին: Մենք ետցնցումային իրավիճակում ենք եւ պետք է ամեն ինչ անենք՝ իրավիճակը կայունացնելու համար»,- ընդգծեց Փաշինյանը՝ հավելելով, որ ամենակարեւոր խնդիրներից մեկը գերիներին վերադարձնելն ու անհետ կորածների ճակատագիրը պարզելն է:
Անդրադառնալով անհետ կորած համարվող 6 զինվորի հայտնաբերվելուն՝ Փաշինյանն ասաց, որ այս սգի մեջ դա մի լուսավոր կետ էր, որքան էլ տարօրինակ թվա՝ դա տրամադրություն փոխեց:
«Այս սգի մեջ, այսքան սգավոր ընտանիքների մեջ ամեն փրկված կյանքը, ինչքան էլ դժվար լինի ասել, մեզ ուրախացնում է»,- շարունակեց վարչապետը՝ ընդգծելով, որ պետք է շարունակել ապրել հանուն զոհված տղաների, համախմբվել, զարգացնել հայրենիքը:
Գյուղացիներից մեկը, դիմելով վարչապետին, ասաց, որ եթե նա հրաժարական տա, կդավաճանի իրենց:
Փաշինյանին դիմեցին տարբեր հարցերով. հուզական վիճակում մեքենայի արագությունը գերազանցելու հետեւանքով առաջացած խնդիրներից՝ մինչեւ անասունների արոտավայրի հարցեր: Վարչապետին ուղեկցող նախարարները վստահեցրին՝ կզբաղվեն բարձրացված հարցերով:
Վարչապետը հեռացավ Սառնակունքից՝ կոչ անելով Հայաստանը նորովի կառուցել:
