Երեւանի Նորաշեն թաղամասի թիվ 49 մանկապարտեզն այսօր իր դռները չի բացել երեխաների առաջ: Վերաբացման նախապատրաստական աշխատանքների ժամանակ աշխատողներից մեկի ջերմությունը բարձր է եղել: Դա արձանագրելուց հետո որոշվում է կայացվել թեստավորել ողջ անձնակազմին՝ կորոնավիրուսի վարակի առկայությունը հաստատելու կամ հերքելու համար:

«Թեստերի պատասխանները դեռ չկան»,- «Հայկական ժամանակ»-ի հարցմանն ի պատասխան՝ նշեց Երեւանի քաղաքապետարանի հասարակայնության հետ կապերի վարչության պետի տեղակալ Տարոն Գեւորգյանը: Նա ընդգծեց, որ մանկապարտեզի վերաբացման հետ կապված քննարկումներ կսկսեն, երբ ստանան թեստերի պատասխանները:

Կորոնավիրուսի առկայությունը հաստատվելու պարագայում, բնականաբար, անհրաժեշտ կլինի ձեռնարկել անվտանգության մի շարք միջոցառումներ, մանկապարտեզի վերաբացումը, թերեւս շուտ չի լինի: «Բայց հուսանք, որ թեստի պատասխանը դրական չի լինի, եւ մանկապարտեզն այդ պարագայում շուտով կշարունակի իր գործունեությունը: Ժամկետների մասին ոչինչ ասել չեմ կարող, դա մեզանից կախված հարց չէ, բժշկական-մասնագիտական հարց է, որ Առողջապահության նախարարությունն է որոշում»,- նշեց Գեւորգյանը:

Առողջապահության նախարարության խոսնակ Ալինա Նիկոողոսյանը, մեր հարցերին պատասխանելով, նշեց, որ յուրաքանչյուր առանձին դեպքի համար որոշում է կայացվում՝ ելնելով մի շարք պայմաններից: Ջերմող մարդու մոտ այլ ախտանիշների առկայության պարագայում նրան խորհուրդ է տրվում շարունակել ինքնամեկուսացված մնալ, հաստատված դեպքի կոնտակտավորներին՝ եւս, նույնիսկ ախտանշանների բացակայության դեպքում խորհուրդ է տրվում ինքնամեկուսանալ 14 օր, այնպես որ հիմա, քանի դեռ ոչ միայն մանրամասները հայտնի չեն, այլեւ թեստերի պատասխաններն էլ չկան, ժամկետներ ենթադրել հնարավոր չէ: «Օրինակ՝ ես էլ ախտանշաններ չունեմ, բայց սերտ շփում եմ ունեցել, ինքնամեկուսացած եմ»,- նշեց խոսնակը:

Տարոն Գեւորգյանից տեղեկացանք նաեւ, որ Երեւան համայնքում թիվ 49-ը միակ մանկապարտեզն է, որ կորոնավիրուսի վարակի առկայության կասկածի պատճառով չի բացվել: Մյուս մանկապարտեզներում նման խնդիր չկա, նրանք այսօր ընդունել են գրանցված փոքրիկներին:

Մանկապարտեզները տեւական ընդմիջումից հետո վերաբացվել են այսօր:

Աղբյուր՝ armtimes.com