Դատախազությունը պարզաբանում է պատերազմի օրերին 60 մլն դրամի ծախս կատարելու մասին լուրերը։ Այս մասին ֆեյսբուքյան գրառմամբ հայտնել է ՀՀ գլխավոր դատախազի խորհրդական Գոռ Աբրահամյանը։
«Այս օրերին, ցավոք, շատ բնորոշ է դարձել հանրային պրկված նյարդերի լարերի վրա խաղալով՝ մանր սենսասցիաների պատրանք ստեղծելու համար «մեկ բաժակ ջրում փոթորիկ առաջացնելը»:
Հերթականը կոնկրետ լրատվամիջոցին հղմամբ՝ այսօր այլ լրատվամիջոցներով ևս տարածված այն լուրն էր, թե իբր պատերազմի օրերին դատախազությունը «ոչինչ չի խնայել» ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի համար նոր ծառայողական մեքենա ձեռք բերելու և ապօրինի ծագում ունեցող գույքի բռնագանձման գործերով վարչության համար նախատեսված վարչական տարածքի վերանորոգման համար՝ այդ նպատակով ընդհանուր ծախսելով 60 մլն ՀՀ դրամ:
Իսկ դատախազությունը պատերազմի ընթացքում, իսկապես, «ոչին չի խնայել»: Հայկական զինված ուժերին ֆինանսական աջակցություն ցուցաբերելու նպատակով ՀՀ դատախազությունն իր բյուջեից այդ ընթացքում 78,5 միլիոն դրամ է փոխանցել «Հայաստան» համահայկական հիմնադրամին։
«Մեկ բաժակ ջրում փոթորիկ առաջացնելու» խնդիրը, հավանաբար, թույլ չի տվել հրապարակվածի մեջ նաև այս մասին հիշատակել»,- գրառել է Աբրահամյանը:
