ՀՀ գլխավոր դատախազությունը ուսումնասիրում է «Հայրենիքի փրկության շարժման» վարչապետի թեկնածու Վազգեն Մանուկյանի կողմից Արարատի մարզում երեկ արված հայտարարությունները: «Հայկական ժամանակի» հարցին ի պատասխան՝ այդ մասին տեղեկացրեց գլխավոր դատախազի խորհրդական Գոռ Աբրահամյանը:
«Մեր կողմից մոնիթորինգի արդյունքում այդ հայտարարությունների վերաբերյալ ԶԼՄ հրապարակումները արձանագրվել են, եւ հիմա դատախազությունը ուսումնասիրություն է իրականացնում այդ կապակցությամբ: Դրանց հետագա ընթացքի, արդյունքների մասին լրացուցիչ կհայտնենք»,- ասաց Աբրահամյանը:
Ընդ որում, ըստ նրա, դատախազությունում ուսումնասիրության առարկա են դարձել Մանուկյանի հայտարարության մի քանի դրվագներ: Առաջին դրվագը վերաբերում է ապստամբության մասին նրա հայտարարություններին: Հաջորդ դրվագը, որ ուսումնասիրության առարկա է դարձել, վերաբերում է Արցախում պատերազմի օրերին Մանուկյանի որոշ գործողություններին:
Եթե անհրաժեշտություն լինի, Վազգեն Մանուկյանը կհրավիրվի ոստիկանություն՝ հայտարարել է ՀՀ փոխոստիկանապետ Արա Ֆիդանյանը՝ կառավարության նիստից հետո լրագրողների հետ ճեպազրույցում անդրադառնալով «Հայրենիքի փրկության շարժման» վարչապետի թեկնածու Վազգեն Մանուկյանի՝ ապստամբությամբ իշխանափոխություն իրականացնելու, շենքեր գրավելու և «զոռով իշխանություն փոխելու» մասին հայտարարություններին: Նա վստահեցրել է, որ ոստիկանությունն անհրաժեշտ բոլոր գործողությունները կատարում է:
«Քրեական օրենսգրքի համապատասխան հոդվածների դիսպոզիցիան հստակ սահմանում է, թե իրենցից ինչ են ներկայացնում համապատասխան գործողությունները, և դրանց քրեաիրավական գնահատական տալու համար միանշանակ հիմքեր են անհրաժեշտ: Եթե մենք ունենանք նման ռիսկեր, իսկ ռիսկերն իրենցից հիմք են ներկայացնում, մենք միանշանակ կձեռնարկենք բոլոր անհրաժեշտ միջոցառումները»,- ասել է Ֆիդանյանը:
ՀՀ փոխոստիկանապետը նաև վստահեցրել է, որ ոստիկանությունը մշտապես ապահովում է թե՛ հասարակության, թե՛ կարևորագույն օբյեկտների անվտանգությունը:
«Արարատի մարզի բնակիչների հետ հանդիպմանը եւ դրա ընթացքում «Հայրենիքի փրկության շարժման» վարչապետի թեկնածու Վազգեն Մանուկյանի արած հայտարարությունների մասին տեսանյութը ՀՀ գլխավոր դատախազությունը ուղարկել է ԱԱԾ՝ դրանում նշված հանգամանքների վերաբերյալ ստուգման գործողություններ իրականացնելու եւ ընթացքը լուծելու համար»: Այս մասին ավելի ուշ հայտնեց ՀՀ գլխավոր դատախազի խորհրդական Գոռ Աբրահամյանը։