Հայաստանում ընթացող վերջին քաղաքական իրադարձություններով պայմանավորված Զյուգանովի գլխավորությամբ «Կոմունիստական կուսակցությունների միություն - Սովետական Միության Կոմունիստական կուսակցություն» անվանումով քաղաքական միավորումը, որն ընդգրկում է նախկին ԽՍՀՄ տարածքում ձևավորված պետությունների կոմունիստական կուսակցությունները, հանդես է եկել իր համար անհեթեթ հայտարարությամբ, որում նա ոչ միայն շեղվում է իր իրական գաղափարախոսությունից, այլ նաև իր ամբողջական աջակցությունն է հայտնում, ուշադրություն, Հայաստանում գործող կապիտալիստական, բուրժուական և օլիգարխիկ ուժերին:

 

Ծիծաղելին այն է, որ նրանք այդ ուժերի առաջնորդներին անվանում են ժողովրդի ընտրյալներ և իր ժողովրդին արժանի որդիներ։ Մարքսը և Էնգելսը, ինչպես նաև Ստալինը և Լենինը վստահ եմ, որ անգամ իրենց ամենավատ երազում նույնիսկ չէին կարող պատկերացնել, որ օրերից մի օր կոմկուսը՝ մարքսիզմ-լենինիզմի, կոմունիզմի, սոցիալիզմի և ինտերնացիոնալիզմի ջատագով, սատար կկանգնի կապիտալիստական ուժերին։ Ասեմ ավելին, վստահ եմ, որ ձախական գաղափարախուսության առաջնորդները գերեզմանում գլխիվայր շրջվեցին, լսելով որ կոմկուսը 2020 թվականին իր աջակցությունն է հայտնում սեփական թշնամիներին, ում դեմ պայքարել էր տասնյակ տարիներ շարունակ։