Սյունիքի մարզում սահմանների անվտանգության հարցով քաղաքացիները բողոքի ակցիա են իրականացնում: Նրանք փակել են Կապանի օդանավակայանի հարակից ճանապարհը:  

Ակցիայի մասնակիցները ոստիկանների հետ զրույցում ընդգծեցին, որ նրանց պահանջն է հանդիպել այն մարդուն, ով իրավասու է այդ հարցը լուծելու: Նշեցին, որ չեն եկել այդտեղ քաղաքական կռվի, այլ եկել են իրենց երեխաների ապագայի համար: Պահանջեցին, որ ոստիկաններն էլ միանան իրենց՝ հարցի լուծումը միասին գտնելու համար:

InterLur.com լրատվական գործակալության փոխանցմամբ` նրանք պատկան մարմիններից երաշխիքներ են ուզում սահմանների անվտանգության հետ կապված: Ցուցարարները նշում են, որ նոյեմբերի 9-ին Հայաստանի, Ադրբեջանի և Ռուսաստանի ղեկավարների միջև ստորագրված եռակողմ հայտարարության մեջ ասվում էր, որ հակամարտող կողմերը պետք է կանգ առնեն իրենց զբաղեցրած դիրքերում, սակայն վերջին օրերի գործընթացներն այդ մասին չեն վկայում։

Ակցիայի մասնակիցները մտադիր են ճանապարհը փակ պահել այնքան, մինչև պատկան մարմիններից հստակեցում լինի։