Փետրվարի 11-ին ԱԺ տնտեսական հարցերի մշտական հանձնաժողովի նախագահի տեղակալ,« Քաղաքացիական պայմանագիր» խմբակցության պատգամավոր Բաբկեն Թունյանը հանդիպել է Երեւանի պետական համալսարանի միջազգային հարաբերությունների ու եվրոպական լեզուների եւ հաղորդակցության ֆակուլտետների չորրորդ կուրսի ուսանողների հետ, որոնք իրենց ճանաչողական պրակտիկան են անցկացնում Ազգային ժողովում:
Բաբկեն Թունյանը կարեւորել է նման հանդիպումները՝ ընդգծելով, որ դրանք առաջին հերթին անհրաժեշտ են հենց խորհրդարանականներին: Նրա խոսքով՝ այս հանդիպումը լավ առիթ է շփվելու այն սերնդի ներկայացուցիչների հետ, որոնք ապագայում կառավարելու են երկիրը:
Պատգամավորն ապագա դիվանագետներին ու լեզվաբաններին ներկայացրել է օրենսդիր մարմնի կառուցվածքը, մանրամասնել օրինագծերի քննարկման ընթացակարգը:
Հանձնաժողովի փոխնախագահի առաջարկով հանդիպումն ընթացել է հարցուպատասխանի ձեւաչափով: Միջազգային հարաբերությունների ֆակուլտետի ուսանողները հետքաքրքրվել են Հայաստանի արտաքին քաղաքականությամբ: Հարցերի առանցքում հայ-թուրքական հարաբերություններն էին, մասնավորապես՝ սահմանի հնարավոր բացման դրական ու բացասական կողմերը: Ուսանողներն անդրադարձել են նաեւ ռազմարդունաբերությանը, գնաճին, ինչպես նաեւ նվազագույն աշխատավարձին վերաբերող հարցերի:
Պատասխանելով ռազմարդյունաբերությանն առնչվող հարցին՝ Բաբկեն Թունյանն ընդգծել է, որ այն առաջին հերթին պայմանավորված է երկրի տնտեսության զարգացմամբ:
Հանդիպման ավարտին ուսանողները հավաստիացրել են՝ հանդիպումն ընթացել է անկաշկանդ մթնոլորտում, եւ իրենք ստացել են հուզող բոլոր հարցերի պատասխանները:
