Մարտի 11-ին՝ ժամը 10:40-ին, ոստիկանության օպերատիվ կառավարման կենտրոնից Նաիրիի բաժնում հաղորդում է ստացվել․ 1-02 ահազանգած անձը հայտնել է, որ մի տղամարդ հետապնդում է նախկին կնոջը։
Նույն դեպքի վերաբերյալ ստացված այլ հաղորդումների համաձայն՝ հետապնդվող կնոջը տեսել են Կոտայքի մարզի Զովունի գյուղի դպրոցի մոտ, որտեղ պայթյունի ձայն է լսվել։
Ոստիկանության Նաիրիի բաժնից դեպքի վայր մեկնած օպերատիվ խումբը Զովունու դպրոցի մոտ հայտնաբերել է 1976 թվականին ծնված Նելլի Ն․-ի և 1976 թվականին ծնված Արտակ Դ․-ի դիերը։ Նախնական տվյալներով՝ նրանց մահը նռնակի պայթյունի հետևանք է։
Դեպքի հանգամանքները պարզվում են։
Զովունու դպրոցի մոտ նռնակի պայթյունի հետեւանքով կնոջ և տղամարդու մահվան դեպքի առթիվ քրեկական գործ է հարուցվել: Այս մասին հայտնում են ՀՀ քննչական կոմիտեից:
ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 235-րդ հոդվածի 1-ին հարուցված քրեական գործի շրջանակներում միջոցառումներ են ձեռնարկվում՝ այսօր Զովունի համայնքում տեղի ունեցած պայթյունի դեպքի հանգամանքները պարզելու ուղղությամբ:
Նախնական տվյալներով 2022թ. մարտի 11-ին՝ ժամը 10:30-ի սահմաններում, քաղաքացին հաղորդում է ներկայացրել այն մասին, որ մայրը առավոտյան ժամը 09:40-ի սահմաններում դուրս է եկել տանից, ապա զանգահարել է իրեն ու հայտնել, որ նախկին ամուսինը հետապնդում է իրեն։
Նույն օրը՝ ժամը 10:40-ի սահմաններում, «Նաիրիի» բժշկական կենտրոնից հաղորդում է ստացվել այն մասին, որ Զովունի համայնքի 40-րդ փողոցում մահացած կնոջ ու տղամարդու դիեր կան։ Կատարվել են անհետաձգելի քննչական և դատավարական այլ գործողություններ, այդ թվում դեպքի վայրի զննություն, որի ընթացքում հիշյալ վայրում հայտնաբերվել են կնոջ և տղամարդու դիեր՝ պայթյունի հետևանքով ստացված մարմնական վնասվածքներով։ Նշանակվել են դատաբժշկական, դատաձգաբանական և դատահետքաբանական փորձաքննություններ: Կատարվում է նախաքննություն: