Ադրբեջանի նախագահ Իլհամ Ալիևը ՌԴ փոխվարչապետ Ալեքսեյ Օվերչուկի հետ այսօր քննարկել է երկու երկրների միջև տնտեսական համագործակցության զարգացումը և Հարավային Կովկասում տրանսպորտային հաղորդակցությունների ապաշրջափակման եռակողմ աշխատանքային խմբի գործունեությունը։ Այս մասին հայտնում են ռուսական լրատվամիջոցները:
«Հանդիպման ընթացքում ընդգծվել է, որ Ադրբեջանի և Ռուսաստանի Դաշնության միջև երկկողմ հարաբերությունները հաջողությամբ զարգանում են բոլոր ոլորտներում, հատկապես նշվել է ապրանքաշրջանառության աճը։ Նշվել է, որ լավ ներուժ կա տնտեսական համագործակցության հետագա ընդլայնման համար», ասված է հայտարարության մեջ։ Մտքեր են փոխանակվել նաև երկկողմ հարաբերությունների զարգացման հեռանկարների շուրջ։
Բացի այդ, նշվում է, որ զրույցի ընթացքում «շոշափվել է փոխվարչապետերի մակարդակով ռուս-ադրբեջանա-հայկական եռակողմ հանձնաժողովի գործունեությունը, քննարկվել են հաղորդակցությունների բացման հետ կապված հարցեր»։
Ադրբեջանի կառավարության տվյալներով՝ երկու երկրների միջև ապրանքաշրջանառությունը 2021 թվականի առաջին 10 ամիսներին աճել է 7%-ով՝ հասնելով 2,35 մլրդ դոլարի, իսկ 2020 թվականի վերջին Ադրբեջանի և Ռուսաստանի միջև ապրանքաշրջանառությունը կազմել է 2,671 մլրդ դոլար։
Հիշեցնենք, 2021 թվականի հունվարի 11-ին Ռուսաստանի, Ադրբեջանի և Հայաստանի ղեկավարները Մոսկվայում կայացած հանդիպման ժամանակ պայմանավորվել են երեք երկրների փոխվարչապետների մակարդակով աշխատանքային խումբ ստեղծելու մասին, որը կկենտրոնանա տրանսպորտային և տնտեսական կապերի հաստատման վրա տարածաշրջանում։