ԱԱԾ-ից մանրամասնում են, թե «Ֆլայ Արմենիա Էյրվեյզ» ավիաընկերությանը պատկանող «Boeing 737-300» տիպի օդանավի անհետացման փաստի առիթով հարուցված քրեական գործը որ հոդվածներով է:
ԱԱԾ լրատվական բաժնից «Հայկական ժամանակի» հարցմանն ի պատասխան փոխանցեցին, որ դեպքի առթիվ հարուցվել է քրեական գործ՝ ՀՀ քրեական օրենսգրքի 221-րդ հոդվածի 2-րդ մասի 1-ին կետով («Օդանավ, նավ կամ երկաթուղային շարժակազմ փախցնելը կամ զավթելը») եւ ՀՀ քրեական օրենսգրքի 325-րդ հոդվածի 1-ին մասով («Փաստաթղթեր, դրոշմներ, կնիքներ, ձեւաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը»):
ԱԱԾ-ից նաեւ հայտնեցին, որ քրեական գործի շրջանակում ձերբակալվածներ դեռեւս չկան: Կատարվում է նախաքննություն:
Հայկական գրանցմամբ եւ համարանիշով ինքնաթիռի Իրանում չարտոնված վայրէջքի մասին լուրերը տարածվել էին դեռեւս փետրվարի 23-ից:
«Boeing 737-300»-ի չարտոնված վայրէջքի ու Հայաստան վերադարձնելու մասին Ազգային ժողովում Կառավարության հետ հարցուպատասխանի ժամանակ խոսել էր նաեւ ՀՀ փոխվարչապետ Տիգրան Ավինյանը: Նա հայտարարել էր, որ հենց այս պահին բանակցություններ են ընթանում, որպեսզի օդանավը մարտի 3-ին վերադառնա Երեւան:
Ավելի ուշ, երբ այդ ժամկետում ինքնաթիռը չվերադարձավ, «Ֆլայ Արմենիա Էյրվեյզ» ավիաընկերությունից «Հայկական ժամանակին» ասացին, որ իրենք մարտի 3-ին օդանավի հնարավոր վերադարձի մասին որեւէ հայտարարություն չեն արել:
Թե երբ օդանավը կլինի Հայաստանում «Ֆլայ Արմենիա Էյրվեյզ» ընկերությունում դժվարանում են ասել: Հետաքրքրվեցինք, թե ինչու է գործընթացը ձգձգվում, գուցե բանակցությունների ընթացքում որեւէ նոր խոչընդո՞տ է առաջացել: «Ֆլայ Արմենիա Էյրվեյզ»-ից չցանկացան մեկնաբանել: «Խնդիրների մասին չենք կարող խոսել, բայց ամեն դեպքում ե՛ւ մեր աշխատակազմը, ե՛ւ այլ ՀՀ կառույցներ աշխատում են»,- եզրափակեցին ավիաընկերությունից:
