67 եւ 41 համարի երթուղիները սպասարկող տրանսպորտային միջոցների գործունեությունը դադարեցվել է: Քաղաքացիների դժգոհությունները հատկապես 67 համարի գազելի աշխատանքի դադարեցման հետ են կապված, քանի որ այն սպասարկում է Ներքին Չարբախը, որտեղ հասարականան տրանսպորտի ընդամենը մի քանի համարներ են հասնում:
Երեւանի քաղաքապետարանից «Հայկական ժամանակ»-ին հայտնեցին, որ երկու երթուղիները սպասարկող՝ 67 եւ 41 համարների շահագործման առավելագույն ժամկետը 15 տարի է եղել, որը լրացել է:
Երկուշաբթի օրվանից (փետրվարի 7) 67-ին կփոխարինեն 54 եւ 14 համարի երթուղայինները: «Այդ երկու համարներն էլ անցնելու են բոլոր այն հատվածներով, որտեղով երթեւեկում էր 67-ը: Ավելին՝ մեքենաքանակներ են ավելանալու, որպեսզի բնակիչները կանգառներում երկար չսպասեն, հատկապես Չարբախում ապրող մեր քաղաքացիները տեղաշարժման խնդիր չունենան»,- հայտնեցին քաղաքապետարանի լրատվական բաժնից: Նշենք, որ 67 համարի վերջնակետը Փարաքար խոշորացված համայնքն էր, սակայն Երեւանի քաղաքապետարանի լրատվականից հայտնեցին, որ այն այլևս Փարաքար չի հասնելու:
Իսկ ինչ վերաբերում է գործունեությունը դադարեցրած 41 համարին, ապա դրա դեպքում ևս քննարկվում է մեկ այլ համարով փոխարինելու հարցը:
67 համարի երթուղին սկսվում է Ներքին Չարբախից, անցնում Արարատյան, Շիրակի , Արտաշիսյան փողոցներով, Բագրատունյաց պողոտայով, Սեբաստիայի, Րաֆֆու Զորավար Անդրանիկի, Օհանովի, Շերամի, Ա. Բաբաջանյան փողոցներով, Էջմիածնի խճուղով, վերջնակետը Փարաքար խոշորացված համայնք էր:
41 համարի երթուղին սկսվում է «Էլեկտրոն» գործարանով, շարունակում՝ Շարուրի, Շիրակի, Արտաշիսյան, Արագածի, Մանթաշյան, Չեխովի, Մայիսի 9-ի, Գարեգին Նժդեհի փողոցներով, Արշակունյաց պողոտա, Գրիգոր Լուսավորչի փողոց, Մեսրոպ Մաշտոցի, Սայաթ-Նովայի պողոտաներ, Վահան Տերյանի, Կորյունի, Խաչատուր Աբովյանի փողոցներ, Աբովյան պուրակ, Սարալանջի փողոց, Ազատության պողոտա, Ադոնցի, Շիրվանզադեի, Մամիկոնյանց, Մալխասյանց փողոցներ: Վերջնակետը Հուշանվերների կոմբինատն է: Հետադարձը՝ նույնը՝ մինչեւ Սարալանջի, Վահան Տերյանի փողոցներ, Աբովյան պուրակ, Խաչատուր Աբովյանի փողոցներ, Սայաթ-Նովայի պողոտա, շարունակությունը՝ նույն ուղեգծով:
