Եթե նախկինում առեւտրի իրականացման վայրերում թույլատրվում էր աշխատանքը միայն պարենային խանութների, դեղատների եւ գյուղատնտեսական արտադրանքի շուկայի մասով, ապա մայիսի 18-ից բաց կլինեն բոլոր առեւտրի իրականացման վայրերը։ Այս մասին այսօր ՀՀ կառավարության մամուլի կենտրոնում ասաց Էկոնոմիկայի նախարարի տեղակալ Վարոս Սիմոնյանը։
Նրա խոսքով՝ ժամանակավորապես չսահմանափակված գործունեության բոլոր տեսակներին թույլատրվելու է գործունեությունն իրականացնել այն պարագայում, եթե ամբողջովին կատարեն ու ապահովեն հավելվածներով սահմանված կանոնները:
Սիմոնյանն ընդգծեց, որ 20 քառակուսի մետր տարածք ունեցող խանութ չի թույլատրվում երկու հոգուց ավելի մուտք գործել։
«Սահմանափակված կմնան գործունեության որոշ տեսակներ, մասնավորապես՝ հյուրանոցային եւ բնակատեղերի տրամադրման ծառայությունները: Բացառություն կլինեն այդ գործունեության տեսակից այն հյուրանոցային ծառայությունները, որոնք կիրականացնեն հյուրերի հաշվառման ռեգիստր: Այդ նախապայմանով վերջիններիս գործունեությունը սահմանափակված չի լինի»,- նշեց փոխնախարարը։