ՀՀ տարածքային կառավարման և ենթակառուցվածքների նախարար Գնել Սանոսյանը շնորհավորական ուղերձ է հղել ՀՀ Անկախության 30-ամյակի կապակցությամբ:
«Սիրելի՛ հայրենակիցներ, այսօր նշում ենք մեր անկախության 30-ամյակը։
Անկախ պետություն ունենալու համար մեր ժողովուրդը միշտ և բոլոր ժամանակներում էլ պայքարել է։ Երբ նպաստավոր պայմաններ են եղել՝ հռչակել է այն։ Նման պատեհություն մեզ ընձեռվեց 1991-ի սեպտեմբերի 21-ին։ Այս օրը մեր ժողովուրդն «Այո» ասաց դարեր շարունակ երազած իր անկախությանը։ Այս օրը երազանքն իրականություն դարձավ։
Նախորդ տարին մարտահրավերներով լեցուն էր մեր անկախ հանրապետության համար, և այդ մարտահրավերները դեռ արդիական են, սակայն համատեղ անխոնջ աշխատանքը, նվիրումը, հայրենասիրությունն առաջնահերթություն դարձնելը երաշխիք է այն բանի, որ շատ շուտով կրկին կունենանք ծաղկող, գրավիչ և անվտանգ Հայաստան։
Ժամանակն է վերաիմաստավորելու մեր բոլոր կորուստներն ու ձեռքբերումները, և ի հեճուկս մեր երկրի առաջ ծառացած խնդիրների՝ հաստատակամ առաջ շարժվելու։
Լիահույս եմ, որ բոլորս կհամախմբվենք այս գաղափարի շուրջ ու կնվիրվենք առավել հզոր հայրենիք ունենալու գործին։
Տոնդ շնորհավոր, իմ անկա՛խ Հայաստան»,- ասված է Գնել Սանոսյանի ուղերձում:
