Այսօր ՀՀ կառավարության նիստում ԿԳՄՍ նախարար Արայիկ Հարությունյանը ներկայացրեց 2020 թ.-ին նախանշված ՀՀ պետբյուջեից ֆինանսավորվող մշակութային մի շարք ծրագրեր, որոնց թվում է նաև Երևանի Հյուսիսային պողոտայում քանդակագործ Արտո Չաքմաքչյանի հեղինակած «Քայլող մարդը» քանդակը տեղադրելու հարցը, ինչը որոշ ընդդիմադիր ուժերի համար դարձավ քաղաքական շահարկումների և մանիպուլյատիվ հոդվածների առիթ:
Խնդիրը կայանում է նրանում, որ որոշ մարդկանց մոտ թյուրիմացաբար է ընկալվում քանդակի անվանումը: Ոմանք այն ասոցացնում են հեղափոխության օրերին կերտված «Քայլող մարդը» արձանի հետ, որի հեղինակն Իջեւան քաղաքի բնակիչ, քանդակագործ Արմեն Դավթյանը, մինչդեռ Արտո Չաքմաքչյանի հեղինակած «Քայլող մարդը» քանդակը ստեղծվել է երկու տասնամյակ առաջ:
Ի դեպ նկատենք, որ սա Արտո Չաքմաքչյանի «Քայլող մարդը» արձանի շուրջ առաջին քաղաքական շահարկումը չէ: Քանդակը նախատեսվում էր տեղադրել Հյուսիսային պողոտայում դեռևս տարիներ առաջ, սակայն քաղաքական նկատառումներով որոշումը կասեցվել էր: Չնայած հիմնավոր փաստարկներին, ընդդիմադիր ուժերի կողմից այնուամենայնիվ փորձ է արվում քանդակը կապել թավշյա հեղափոխության հետ: