Նոյեմբերի 9-ին Ռուսաստանի, Հայաստանի եւ Ադրբեջանի կողմից ստորագրված եռակողմ հայտարարության գլխավոր արդյունքը Լեռնային Ղարաբաղում արյունահեղության դադարեցումն է: Այս մասին մամուլի ասուլիսի ժամանակ հայտարարել է ՌԴ նախագահ Վլադիմիր Պուտինը:
«Մարտական գործողությունների դադարեցման շուրջ պայմանավորվածությունը շատ կարեւոր է, քանի որ արյունահեղությունը դադարեցվում է, եւ դա չափազանց կարեւոր եւ սկզբունքային է, մնացածը երկրորդական է: Մարդկանց կյանքի եւ առողջության պահպանումը ամենակարեւոր խնդիրն է, որը մենք լուծել ենք»,-ասել է Պուտինը:
ՌԴ նախագահը նաեւ հույս է հայտնել, որ Ղարաբաղում ռուս խաղաղապահների տեղակայումից հետո Հադրութի շրջանում հայ եւ ադրբեջանցի զինծառայողների միջեւ տեղի ունեցած վերջին բախումը կլինի էսկալացիայի միակ դեպքը պատերազմի դադարեցումից հետո: «Հուսով եմ, որ դա կմնա միակ դեպքը, եւ ի վերջո կհաջողվի նստել բանակցությունների սեղանի շուրջ»,-ասել է Պուտինը: