«Մենք դեռ չենք հասցրել պետական մակարդակով խոնարհումի միջոցառումներ ու սգո օրեր հայտարարել, և դա անելը ճիշտ կլինի չճանաչված մարմինների ճանաչումից հետո»:
Այս մասին այսօր հղած իր ուղերձում նշեց ՀՀ վարչապետ Նիկոլ Փաշինյանը՝ շարունակելով.
«Սա պիտի լինի խոնարհումի, մտորումի, մորմոքի մի շրջան, և այն պետք է ապրենք իրար հետ ու իրարով: Սա պետք է լինի մտորում անցյալի ու ապագայի մասին: Առավել միտված ապագային»:
Խոսելով սահմանների շուրջ տարվող աշխատանքների մասին, ՀՀ վարչապետը նշեց.
«Այս օրերին Հայաստանի սահմանների որոշ հատվածներում տեղի են ունենում գործընթացներ, որոնք ցավոտ են և ցավով են ընդունվում մեր որոշ հայրենակիցների կողմից, սա, իհարկե, հասկանալի է, բայց մենք պետք է արձանագրենք, որ մեր Զինված ուժերը տեղաբաշխվում են մեր՝ Հայաստանի Հանրապետության սահմանի երկայնքով, խոսքը տվյալ դեպքում հայաստանյան հատվածի մասին է, Արցախի պարագան առանձին խնդիր է: Այստեղ տարբեր գործնական խնդիրներ կան, բայց դրանք անլուծելի չեն»,- ասաց նա՝ նշելով, որ այդ խնդիրների ուղղությամբ աշխատանքներ են տարվում:
«Կրկնում եմ՝ մեր ԶՈւ-ն տեղաբաշխվում է ՀՀ սահմանի երկայնքով, պետք է խնդրեմ այս առիթով ամեն անգամ խուճապային տրամադրության մեջ չընկնել, մեր հետագա գործողությունները պետք է միտված լինեն նրան, որ դա դառնա սահման, ոչ թե ռազմաճակատի գիծ, և մենք պետք է գնանք այդ ճանապարհով»,-նշեց վարչապետը:
Խոսելով Մեղրիի խնդրի տարընթերցումների մասին, ՀՀ վարչապետն ասաց.
«Նոյեմբերի 9-ի հայտարարության առթիվ ինչ-որ մարդիկ շրջանառության մեջ են դնում «Մեղրիի միջանցք» հասկացությունը: Ուզում եմ բոլորիդ ուշադրությունը հրավիրել այն փաստի վրա, որ հայտարարության մեջ «Մեղրիի միջանցք» հասկացություն չկա, կա այլ բան՝ տրանսպորտային ենթակառուցվածքների ապաշրջափակում, եթե մենք ապագայի մասին պետք է մտածենք, պետք է մտածենք տնտեսական կյանքում նոր գործոնների ի հայտ գալու մասին»:
