ՀՀ վարչապետ Նիկոլ Փաշինյանն այսօր հրավիրած ասուլիսի ընթացքում անդրադարձավ ՀՀ նախագահ Արմեն Սարգսյանի հրաժարականի դիմումին։

«Ես հրաժարականի մասին իմացել եմ հրապարակայնացումից ընդամենը ժամեր առաջ, մոտավորապես 3․5 ժամ առաջ։ Զանգահարել է ինձ, խոսել ենք այդ մասին։ Ես Հանրապետության նախագահին հարցրել եմ՝ ինքը ինձ հետ քննարկո՞ւմ է հարցը, թե՞ ինձ տեղեկացնում է, որ ինքը կայացրել է որոշում։ Փորձել եմ հասկանալ՝ այդ որոշումը քննարկման ենթակա՞ է, թե՞ քննարկման  ենթակա չէ, որից հետո ինքն ասել է, որ կայացրել է որոշում»,- ասաց Փաշինյանը։

« Հրաժարական տալու մտադրության մասին հայտարարությունը հրապարակելուց  ժամեր առաջ եմ իմացել այդ մասին, իսկ մեր քաղաքական թիմն ավելի ուշ է տեղեկացել: Մենք նախկինում այդ թեմայով քննարկում երբեք չենք ունեցել: Հասկանալի է, որ լրջորեն պետք է քննարկել: Քննարկումների ընթացքում, որոշումներ կայացնելիս պետք է առաջնորդվենք վերջին 4 տարվա պատմության փորձով: Կարող եմ իմ եզրակացությունը ասել, որ պետք է գնանք այնպիսի լուծումների, որ ՀՀ նախագահի, կառավարության, խորհրդարանական մեծամասնության միջև լինի ներդաշնակություն: Առավել ևս հիմա, երբ մենք կանգնած եք լրջագույն մարտահրավերների առաջ: Կարծում եմ, որ պետք է լինի այնպիսի մի իրավիճակ, որ խորհրդարանը, կառավարությունը, նախագահն իրենց կապված զգա միասնական պատասխանատվությամբ»,-ասաց Նիկոլ Փաշինյանը:

ՀՀ վարչապետի խոսքով, ներդաշնակության սակավության պատճառով շատ լուրջ մարտահրավերներ եղան: Մասնավորապես, ՀՀ ԶՈՒ գլխավոր շտաբի հայտարարության համատեքստում, Նիկոլ Փաշինյանի կարծիքով, ժողովուրդը պետականության կորստի եզրին էր գտնվում:

«Շատ կարևոր է, որ այդպիսի իրավիճակներին չառնչվենք: Կարծում եմ, որ նախագահի ընտրության հարցում ճգնաժամային իրավիճակ, ռիսկեր չունենք: ՔՊ-ն ի վիճակի է ընտրել նախագահ առնվազն երկրորդ փուլում: Չեմ կարծում, որ պետք է գնանք էքսպերիմենտների: Պետք է գնանք ներդաշնակության հանուն Հայաստանի Հանրապետության»,-ասաց վարչապետը:  

Վարչապետը նշեց, որ Սահմանադրության հետ կապված ՀՀ նախագահի դիրքորոշումը հայտնի է։

«Իմ դիրքորոշումն այդ կապակցությամբ մի փոքր տարբերվում է Հանրապետության նախագահի դիրքորոշումից կամ էականորեն է տարբերվում։ Բայց նաև ուզում եմ ընդգծել, որ 2018 թվականից հետո, երբ Արմեն Սարգսյանն ընտրվել է ՀՀ նախագահ, հետո ես ընտրվել եմ վարչապետ, այդ ժամանակվանից ի վեր Սահմանադրության մեջ որևէ դրույթի փոփոխություն տեղի չի ունեցել, համենայն դեպս, նախագահի լիազորությունների մասով: Հրաժարականի դրդապատճառների մասին այնտեղ կան բացատրություններ, կարծում եմ, որ ես ինքս էլ այդ բացատրություններն ընդունում եմ ի գիտություն և պատեհ չեմ համարում, որ ես մեկնաբանեմ՝ ինչն է բավարար, ինչը բավարար չէ»,- ասաց Նիկոլ Փաշինյանը։

Ասուլիսի ընթացքում Արմեն Սարգսյանի քաղաքացիության մասին հարց հնչեց, որը վերաբերում էր «Հետք»-ի հետաքննությանը։ Այնտեղ նշվում է, որ Արմեն Սարգսյանը Կարիբյան ծովում գտնվող Սենթ Քիթս և Նևիսի քաղաքացի է։

«Եթե այդտեղ կա որևէ փաստ, որին ՀՀ պետական որևէ մարմին պետք է արձագանքի, կարծում եմ՝ պետական մարմինները պետք է զբաղվեն դրանով»,- ասաց Նիկոլ Փաշինյանը։

«2018-ի հեղափոխությունից հետո շատերն էին ինձ համոզում, որ գնանք Սահմանադրական փոփոխությունների։ Ես դեմ եմ արտահայտվել դրան մի նկատառումով, որ խորհրդարանական կառավարման համակարգը նոր է, և պետք է դրան հնարավորություն տալ։ 2020 թվականի նոյեմբերի 9-ից հետո շատ կային կարծիքներ, որ կառավարման համակարգի պատճառով էր մեր ձախողումները։ Այդ ժամանակ մտածում էի արդեն սրա մասին լրջորեն։ Բայց, երբ ընտրություններից հետո մենք երկրում ներքաղաքական ճգնաժամը հաղթահարեցինք, և մեզ հաջողվեց ժողովրդավար ընտրություններ անցկացնել, ես հասկացա, որ եթե մենք խորհրդարանական կառավարման համակարգում չլինեինք, մեծ էր հավանականությունը, որ մենք շատ լուրջ ցնցումների միջով կանցնեինք ու ճգնաժամն էլ ավելի կխորանար»,-ասաց վարչապետը։