Երևանի ավագանու «Իմ քայլը» խմբակցության անդամներ Հայկ Մարությանը, Պավել Մազմանյանը, Լիլիթ Պիպոյանը և Ռուբեն Հայրապետյանը դիմումներ են ներկայացրել ավագանու անդամի իրենց լիազորությունները դադարեցնելու մասին: Դեկտեմբերի 28-ի արտահերթ նիստին այս մասին հայտարարեց Երևանի քաղաքապետ Հրաչյա Սարգսյանը:
Նա նշեց, որ Երևանի ավագանու «Իմ քայլը» խմբակցության անդամ Վահե Գևորգյանը դիմում է ներկայացրել խմբակցությունից դուրս գալու մասին: Նա շարունակելու է ավագանու անդամի իր լիազորությունները և համապատասխան հանձնաժողովում իր աշխատանքը:
«Իմ քայլը» դաշինքի ընտրացուցակից ընտրված և լիազորությունները վաղաժամկետ դադարեցրած ավագանու անդամ Գրիգոր Երիցյանի և Գայանե Վարդանյանի մանդատները տրվել են ընտրացուցակի հաջորդ թեկնածուներ Միսակ Սարգսյանին և Գառնիկ Վարդանյանին:
Երևանի քաղաքապետ Հրաչյա Սարգսյանն ավագանու արտահերթ նիստում առաջարկեց քաղաքապետի առաջին տեղակալ նշանակել Երևանի ավագանու «Իմ քայլը» խմբակցության քարտուղար Լևոն Հովհաննիսյանին:
«Լևոն Հովհաննիսյանը բավականին մեծ բանկային փորձ ունի, ֆինանսական ոլորտում ունի մեծ հաջողություններ, տարբեր պաշտոններ է ունեցել»,- ասաց Սարգսյանը:
37 կողմ, 1 դեմ, 3 ձեռնպահ ձայներով Հովհաննիսյանն ընտրվեց Երևանի քաղաքապետի առաջին տեղակալ:
Երևանի ավագանին որոշում է կայացրել 347 միլիոն դրամ ուղղել «Երևանի ավտոբուս» փակ բաժնետիրական ընկերությանը` բնականոն գործունեությունն ապահովելու համար: Որոշման նախագիծը ներկայացրեց Երևանի քաղաքապետի տեղակալ Սերգեյ Ներսիսյանը:
«Երևան քաղաքի ավագանու 2020 թվականի դեկտեմբերի 23-ի N 310-Ն որոշման մեջ փոփոխություններ կատարելու մասին» Երևան քաղաքի ավագանու որոշման նախագծի ընդունման առնչությամբ այլ իրավական ակտերի ընդունման կամ փոփոխության անհրաժեշտություն չի առաջանում:
Երեւանի ավագանու 8-րդ նստաշրջանի առաջին նիստը կգումարվի 2022 թվականի փետրվարի 8-ին, ժամը 11-ին: Այս մասին, այսօր՝ դեկտեմբերի 28-ին, Երեւանի ավագանու արտահերթ նիստում հայտարարեց Երեւանի նորընտիր քաղաքապետ Հրաչյա Սարգսյանը:
Հիշեցնենք, որ այսօր Երեւանի ավագանին արտահերթ նիստ է հրավիրել, որի օրակարգում ընգրկված է 22 հարց: Սա Հայկ Մարությանի՝ քաղաքապետի պաշտոնից հեռացվելուց հետո ավագանու առաջին նիստն է։ Հիշեցնենք, որ դեկտեմբերի 21-ին նախատեսված Երեւանի ավագանու հերթական նիստը չկայացավ, քանի որ «Իմ քայլը» խմբակցությունը բոյկոտեց այն, իսկ դրա հաջորդ օրը արտահերթ նիստում անվստահություն հայտնեցին քաղաքապետ Հայկ Մարությանին:
