Ապարան քաղաքի շրջակա համայնքների բնակիչները բողոքի ակցիա են իրականացրել` պահանջելով համայնքի ղեկավարներից իրենց անունից հանդես չգալ ՀՀ վարչապետ Նիկոլ Փաշինյանի հրաժարականի կոչով: Ակցիայի մասնակիցները նշում են՝ սատարում են ՀՀ վարչապետին, իսկ ենթադրյալ պահանջը սխալմունք է եղել։ Ցուցարարները շեշտում էին, որ Հարթավանի գյուղապետը վարչապետի հրաժարական է պահանջել իր անունից, ոչ թե համայնքի, առանձնահատուկ ուշադրություն հրավիրելով այն փաստին, որ համայնքի ղեկավարն ու ավագանին չեն կարող ժողովրդի անունից վարչապետի հրաժարական պահանջել։
Ինչպես տեղեկացնում է InterLur.com լրատվական գործակալությունը, բնակիչներից մեկն ասաց, որ իրենք պայքարում են պետության և պետականության համար, որի հիմքերը փորձում են համայնքապետները խաթարել: «Համայնքապետերն իրենց կարծիքն են հայտնել, ժողովրդի անունից ոչինչ չկա: Որևէ մեկին չեն հարցրել, թե արդյոք ցանկանում ենք, որպեսզի Նիկոլ Փաշինյանը հեռանա պաշտոնից: Մենք մեր վարչապետի հետ ենք և վարչապետին էլ խորհուրդ ենք տալիս, որպեսզի մեկ քայլ հետ չգնա»,- ասաց Ապարանի բնակիչներից մեկը:
Բնակչերին մոտեցավ Շենավան համայնքի ղեկավարը և ասաց, որ իր կողմից թյուրիմացություն է եղել ՀՀ վարչապետ Նիկոլ Փաշինյանի հրաժարական պահանջելը, որի համար զղջում է և ներողություն խնդրում: «Մեր գյուղը միշտ եղել է Նիկոլի հետ և Նիկոլի կողքին, որտեղ ժողովուրդը, այնտեղ ես»,- ընդգծեց Շենավան համայնքի ղեկավարը: Առավել մանրամասն ստորև ներկայացվող տեսանյութերում։
