Ընդհանուր առմամբ, հայ-թուրքական օրակարգ դեռևս չկա, Հանրային հեռուստաընկերությանը տված հարցազրույցում ասել է Հայաստանի Անվտանգության խորհրդի քարտուղար Արմեն Գրիգորյանը։
«Հայաստանը բազմիցս ասել է, որ մենք գտնում ենք, որ պետք է նստել սեղանի շուրջ, խոսել և հասկանալ, թե ինչպիսի օրակարգ կարող ենք ձևավորել։ Դեռևս, ընդհանուր առմամբ, օրակարգ չկա»,-նշել է նա։
ԱԽ քարտուղարն ասել է, որ Հայաստանը պատրաստ է այդ քննարկումներին։
Նրա խոսքով՝ հարաբերությունների կարգավորման համար տարածաշրջանում կան հնարավորություններ․
«Օրինակ՝ Կարս-Գյումրի երկաթուղու բացումը Հայաստանի և Թուքիայի համար մեծ հնարավորություններ է ստեղծում, և դա նաև տնտեսապես փոխկախվածություն է ստեղծում Հայաստանի և Թուրքիայի միջև, ինչը, կարծում ենք, որ կայունության և անվտանգության համար կարևոր գործոն է»,-ասել է Արմեն Գրիգորյանը։
Նա կարևորել է քննարկման հնարավորությունը։
«Երկու կողմերն էլ հայտարարություններ են անում, բայց մենք երբեք չենք նստում հասկանալու, թե ինչ նկատի ունի Հայաստանը և ինչ՝ Թուրքիան։ Մենք փորձում ենք այդ ամենը վերլուծել մեր անվտանգության կառույցներում, բայց կա ավելի հեշտ ճանապարհ՝ նստել սեղանի շուրջ, լսել միմյանց և հասկանալ միմյանց օրակարգը, որպեսզի տեսնենք, թե որտեղ կարող ենք համագործակցել»,-ասել է Արմեն Գրիգորյանը։
Արմեն Գրիգորյանը նշել է, որ «3+3» ձևաչափի շրջանակներում, եթե առիթ լինի, Հայաստանը պատրաստ է գնալ Անկարա, Բաքու, նաև պատրաստ է հյուրընկալել այդ երկրներին՝ տարածաշրջանային խնդիրների վերաբերյալ քննարկումներ կազմակերպելու համար։
