«Հեռու ենք այն մտքից, թե 2022 թվականի պետբյուջեն կլուծի մեր առջև ծառացած բոլոր խնդիրները, և բազմաթիվ, այդ թվում՝ սոցիալական խնդիրներ մնալու են դեռևս չլուծված»,- այսօր՝ հոկտեմբերի 25-ին, ԱԺ հանձնաժողովների համատեղ նիստում բյուջետային քննարկումների ժամանակ ասաց վարչապետ Նիկոլ Փաշինյանը:
Նրա խոսքով՝ աղքատության և սոցիալական պաշտպանության խնդիրները արմատապես լուծելու համար անհրաժեշտ են ամուր տնտեսական և անվտանգային հիմքեր. «Այդ հիմքերը մենք ստեղծելու ենք առաջիկա մի քանի տարիների ընթացքում»:
«2022 թվականի բյուջեում մենք ձգտել ենք զգուշորեն բալանսավորել կառավարության առաջնահերթությունները, միաժամանակ ապահովել տարատեսակ ֆիսկալ ռիսկերի կառավարելիությունը»,- նշեց վարչապետ Նիկոլ Փաշինյանը և վստահություն հայտնեց, որ կառավարության ծրագիրը հաջողությամբ իրագործվելու է՝ ապահովելու համար ՀՀ քաղաքացիների անվտանգությունը, բարեկեցությունը և արժանապատիվ կյանքը:
