ՀՀ վարչապետ Նիկոլ Փաշինյանն ամփոփեց ռազմական գործողություններից հետո Արցախի բնականոն կյանքի վերականգնման համար իրականացված միջոցառումները:
«Առաջինը՝ Արցախում հաշվառված քաղաքացիների աջակցության ծրագիրը, որից օգտվում է շուրջ 87 հազար շահառու, և կառավարությունն այս նպատակով հատկացրել է 6.4 միլիարդ դրամ: Հաջորդ միջոցառումը Արցախի վերահսկողությունից դուրս գտնվող համայնքների բնակիչների աջակցության ծրագիրն է: Այստեղ մենք ունենք 2000 շահառու: Կառավարությունը հատկացրել է մոտ 600 միլիոն դրամ: Արցախում դեկտեմբեր ամսվա կենսաթոշակները և նպաստները վճարելու նպատակով Արցախի կառավարությանը գումար հատկացնելու մասին որոշում ենք կայացրել, որի շրջանակներում հատկացվել է շուրջ 940 միլիոն դրամ:
Արցախում պետական աշխատողների դեկտեմբերի աշխատավարձերը վճարելու նպատակով Արցախի կառավարությանը հատկացրել ենք մոտ 3.1 միլիարդ դրամ: Արցախի բնակչության վերջին երեք ամսվա կոմունալ վճարումների նպատակով հատկացրել ենք շուրջ մեկ միլիարդ դրամ»,- ասաց վարչապետը: Նրա խոսքով՝ բացի այդ ծրագրերից, որոնք իր հրապարակած ճանապարհային քարտեզի շրջանակում են, Կառավարությունը հաստատել է ևս 8 միջոցառում:
Փաշինյանի խոսքով՝ ծրագրերն ընթացքի մեջ են, և առաջիկայում կներկայացվեն դրանց իրականացման վերաբերյալ հաշվետվությունները:
Կառավարությունը հաստատեց Արցախի նախադպրոցական տարիքի երեխաների ամանորյա աջակցության միջոցառումը հաստատելու մասին հարցը:
ՀՀ աշխատանքի և սոցիալական հարցերի նախարար Մեսրոպ Առաքելյանը տեղեկացրեց, որ միջոցառումը աջակցության միանվագ ծրագիր է, իսկ շահառուները Արցախում գրանցված նախադպրոցական տարիքի՝ 2015-ի հունվարի 1-ից հետո ծնված երեխաներն են: Աջակցության չափը յուրաքանչյուր երեխայի չափով կազմում է 20 հազար դրամ:
«Աջակցությունը նախատեսվում է տրամադրել հաջորդ շաբաթվա ընթացքում՝ մինչև Ամանորը, «Հայփոստի» և «Արցախփոստի» բաժանմունքներում՝ կապված քաղաքացիների գտնվելու վայրից: Ցանկանում եմ միջոցառման գաղափարի համար շնորհակալություն հայտնել մեր նախարարության աշխատակիցներին, քանի որ գաղափարը ծնվել է նրանց առաջարկով և ֆինանսավորվում է պարգևավճարների և աշխատավարձի հավելավճարների ամբողջ ֆոնդով»,- նշեց Առաքելյանը:
Վարչապետ Նիկոլ Փաշինյանը հավելեց, որ պետք է առավելագույնն անել, որ երեխաները չզրկվեն ամանորյա միջոցառումներից: Ամանորյա ներկայացումներ կլինեն թատրոններում, և դրանց պետք խրախուսել: