Երեկ տեղի է ունեցել Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանի և Ռուսաստանի Դաշնության փոխվարչապետ Ալեքսեյ Օվերչուկի հանդիպումը։

Ինչպես հայտնում են ՌԴ-ում ՀՀ դեսպանությունից, զրույցի ընթացքում Ա․ Օվերչուկը շնորհավորել է Վ․Հարությունյանին ՌԴ-ում ՀՀ դեսպանի պաշտոնը ստանձնելու առնչությամբ՝ մաղթելով հաջողություններ հետագա գործունեության ընթացքում։

Դեսպան Հարությունյանն իր հերթին շնորհակալություն է հայտնել Օվերչուկին ջերմ ընդունելության և բարեմաղթանքների համար՝ ընդգծելով հայ-ռուսական հարաբերությունների հետագա զարգացմանն ուղղված համատեղ արդյունավետ աշխատանքի կարևորությունը։

Կողմերը քննարկել են Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի օրակարգում ներառված մի շարք հարցեր, անդրադարձ են կատարել ԵԱՏՄ շրջանակներում երկու երկրների միջև համագործակցությանը։

ՌԴ փոխվարչապետը գոհունակություն է հայտնել հայ-ռուսական բազմոլորտ համագործակցության ընթացքից՝ ընդգծելով դրա ողջ ներուժի զարգացման կարևորությունը։

Բարձր գնահատելով երկկողմ փոխգործակցության ներկայիս մակարդակը՝ ՌԴ-ում ՀՀ դեսպանը նշել է Ռուսաստանի առանձնահատուկ դերը Հայաստանի տնտեսական կյանքում և տարածաշրջանի առանցքային հարցերում։