Ռուս զինվորականներն ու սահմանապահները կանխել են Ուկրաինայի տարածքից մի խումբ դիվերսանտների կողմից պետական սահմանի խախտումը, RIAnovosti-ի փոխանցմամբ՝ այս մասին հայտնում է Հարավային ռազմական օկրուգի մամուլի ծառայությունը։
«Հարավային ռազմական օկրուգի ստորաբաժանումը Ռուսաստանի ԱԴԾ սահմանապահ ջոկատի հետ միասին կանխել է դիվերսիոն-հետախուզական խմբի կողմից Ուկրաինայի տարածքից Ռուսաստանի պետական սահմանի խախտումը»,- նշել են նրանք։
Միջադեպը տեղի է ունեցել տեղի ժամանակով առավոտյան 06։00-ի սահմաններում Ռոստովի մարզի Միտյակինսկայա գյուղի մոտ։
Ինչպես հավելել են գերատեսչությունում, փոխհրաձգության ժամանակ Ուկրաինայի զինված ուժերի երկու հետևակի մարտական մեքենաներ մտել են Ռուսաստանի տարածք՝ դիվերսանտներին տարհանելու համար։ Երկու ՀՄՄ-ն էլ ոչնչացվել են: Դիվերսիոն խմբավորման հինգ անդամ զոհվել են, ռուս զինվորականների կողմից զոհեր չկան։