Ռուսաստանի նախագահ Վլադիմիր Պուտինի հրամանը՝ միջուկային ուժերը բարձր մարտական պատրաստականության վիճակի բերել Ուկրաինա ներխուժման ֆոնին, էսկալացիա է, որը կարող է իրավիճակը դարձնել «շատ ավելի վտանգավոր»: Այս մասին կիրակի օրը հայտարարել է ԱՄՆ պաշտպանական գերատեսչության բարձրաստիճան ներկայացուցիչը։
Պուտինը հրաման է տվել այն պահին, երբ, Վաշինգտոնի գնահատմամբ, քառօրյա ներխուժումից հետո ռուսական զորքերն անսպասելի անհաջողություններ են կրում մարտի դաշտում:
Ինչպես հայտարարել են ամերիկացի պաշտոնատար անձինք, դրան նպաստել են Ուկրաինայի հզոր դիմադրությունն ու գործողությունների խափանումները, որոնք հանգեցրել են նրան, որ որոշ ստորաբաժանումներ մնացել են առանց վառելիքի մատակարարման և այլ սարքավորումների:
Պենտագոնը Պուտինի հրամանի մասին իմացել է Ռուսաստանի նախագահի հեռուստաուղերձից, այլ ոչ թե ամերիկյան հետախուզության աղբյուրներից, հայտնել է Պենտագոնի բարձրաստիճան ներկայացուցիչը:
Պուտինի ելույթից անմիջապես հետո ԱՄՆ-ի պաշտպանության նախարար Լլոյդ Օսթինը, շտաբների պետերի միացյալ կոմիտեի նախագահ գեներալ Մարկ Միլին և Եվրոպայում ԱՄՆ-ի զինված ուժերի հրամանատար Թոդ Ուոլթերսը հանդիպում են անցկացրել, որտեղ քննարկել են Ռուսաստանի նախագահի այս որոշումը: «Ըստ էության, այն խաղի մեջ է դնում ուժեր, որոնք սխալ հաշվարկի դեպքում կարող են իրավիճակը շատ ավելի վտանգավոր դարձնել», – ասել է լրատվամիջոցի անանուն պաշտոնյան:
Պատասխանելով այն հարցին, թե կշարունակի՞ արդյոք ԱՄՆ-ը ռազմական օգնություն ցուցաբերել Ուկրաինային, աշխատակիցը ասել է․ «Այդ աջակցությունը շարունակվելու է»:
ԱՄՆ-ի գնահատականներով՝ Ռուսաստանն ավելի քան 350 հրթիռ է արձակել Ուկրաինայում թիրախների ուղղությամբ, որոնցից մի քանիսը մեծ վնասներ են հասցրել քաղաքացիական ենթակառուցվածքներին: Խոսելով Կիևից հյուսիս գտնվող Չերնիգով բնակավայրի վրա ռուսական հարձակման մասին՝ աշխատակիցն ասել է, որ կան նշաններ, որ Ռուսաստանը կիրառում է պաշարման մարտավարությունը, – եզրափակել է նա:
