Փոխվարչապետ Տիգրան Ավինյանը կառավարության նիստում նշեց, որ Արցախի Հին Շեն գյուղում միջդիրքային հաղորդակցությունն առկա է, խնդիրը, սակայն, ամբողջապես հանգուցալուծված չէ: Ինչպես փոխանցում է InterLur.com լրատվական գործակալությունը, փոխվարչապետն ասաց, որ այդ հատվածում տեղակայված են ռուսական խաղաղապահ զորքերը:
«Ակնկալում ենք, որ կունենանք վերջնական հանգուցալուծում: Պաշտպանության նախարարը Սյունիքում է, սահմանապահ զորքերը մեր սահմանների երկայնքով իրականացնում են տեղակայման աշխատանքներ», - ասաց փոխվարչապետը:
Նշենք, որ ՀՀ պաշտպանության նախարար Վաղարշակ Հարությունյանը դեկտեմբերի 17-ի առավոտյան աշխատանքային այցով մեկնել է Սյունիքի մարզ՝ տեղում ծանոթանալու Ադրբեջանի հետ սահմանային շրջաններում իրականացվող ամրաշինական, մարտական հենակետերի կառուցման աշխատանքներին, ինչպես նաև հետևելու մարտական հերթապահության կրման ընթացքին։ Այս մասին հայտնեցին ՀՀ պաշտպանության նախարարության տեղեկատվության և հասարակայնության հետ կապերի վարչությունից:
