ԱԺ-Կառավարություն հարցուպատասխանի ժամանակ ՀՀ վարչապետ Նիկոլ Փաշինյանն անդրադարձավ գերիների վերադարձի գործընթացին: Վարչապետը նշեց՝ այդ գործընթացից դժգոհություն կա ոչ միայն Շիրակի մարզում, այլև Կառավարությունում. այս իրավիճակից որևէ մեկը գոհ չէ:
«Գերիների խնդրի մասին մեզ ու ինձ հիշեցնելու անհրաժեշտություն չկա, որովհետև մենք ոչ մի վայրկյան այդ խնդրի մասին չենք մոռանում: Այդ խնդրի հետ կապված մեզ որևէ գործողության դրդելու համար որևէ ակցիա իրականացնելու անհրաժեշտություն չկա: Սա այն երևույթն է, որտեղ մենք պետք է առաջնորդվենք բժշկական սկզբունքով՝ չվնասել»,- նշեց Փաշինյանը՝ հավելելով, որ այս ընթացքում եղել են գործողություններ, որոնք կատարելիս մտածել ենք, թե դա օգնում է, բայց հակառակը՝ վնասել է գործընթացին: Ռուսաստանի մեր գործընկերները շատ ակտիվ ներգրավված են գործընթացում՝ ընդգծեց Կառավարության ղեկավարը:
«Այո, մենք էլ գոհ չենք այն արդյունքներից, որն այս պահին ունենք, բայց սա չի նշանակում, թե մենք որևէ վայրկյան դադարեցնում ենք կամ պետք է դադարեցնենք այս ուղղությամբ աշխատանքը: Եվ ես համոզվել եմ, որ որքան քիչ լինի հրապարակայնությունն այս աշխատանքի նկատմամբ, այնքան լավ»,- եզրափակեց վարչապետը:
ՀՀ վարչապետ Նիկոլ Փաշինյանը մտադիր է առաջիկայում այց կատարել Շիրակի մարզ և հանդիպել Ադրբեջանում պահվող գերիների հարազատներին: Այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում, պատասխանելով «Իմ քայլը» խմբակցության անդամ Նազելի Բաղդասարյանի հարցին:
«Դժգոհություն կա ոչ միայն Շիրակի մարզում, դժգոհություն կա նաև կառավարությունում: Բոլորս էլ դժգոհ ենք: Պլանավորում ենք մենք այց Շիրակի մարզ, որտեղ տարբեր հանդիպումներ կունենանք քաղաքացիների հետ, այդ թվում` գերիների հարազատների հետ: Ուզում եմ անել հավաստիացում` գերիների խնդրի մասին մեզ հիշեցնելու անհրաժեշտություն չկա, որովհետև մենք ոչ մի վայրկյան այդ խնդրի մասին չենք մոռանում: Այդ խնդրի հետ կապված մեզ որևէ գործողության դրդելու համար ակցիա անելու անհրաժեշտություն չկա»,- նշեց վարչապետը: Փաշինյանը նշեց, որ գերիների հետ կապված հարցում պետք է առաջնորդվել չվնասելու սկզբունքով:
«Մենք այս ընթացքում էլ համոզվեցինք, որ եղել են մի շարք գործողություններ, որոնք թվացել է, որ տեղի են ունենում ի նպաստ խնդրի շուտափույթ լուծման, բայց գործնականում հակառակն է տեղի ունեցել»,- ասաց Նիկոլ Փաշինյանը: