«Այսօր պարետի որոշմամբ կարգելափակվի ելքերն ու մուտքերը՝ Գեղարքունիքի մարզի Ձորագյուղից: Պատճառն այն է, որ մեր սիրելի հայրենակիցներից մեկը Ձորագյուղից գնացել է Գողթ գյուղ թաղման, երեք չորս օր անց թաղման է մասնակցել իրենց գյուղում, ինչի արդյունքում Ձորագյուղում արդեն ունենք կորոնավիրուսի 63 դեպք: Այս 63-ից մի քաղաքացի թաղման է մասնակցել Ծովասար գյուղում»:
Այս մասին ֆեյսբուքյան իր էջում հայտնել է ՀՀ վարչապետ Նիկոլ Փաշինյանը:
Նա հիշեցրել է, որ նման դեպք է եղել նաև Դդմաշենում, երբ Հրազդանից եկել են թաղման, սգակիր տան անդամներին են վարակել, ինչի հետեւանքով այդ տան պապը մահացել է, գյուղում էլ գրանցվել է 100֊ից ավել դեպք, Դդմաշենը փակվել է։
« Դդմաշենի թաղման հետ կապված մարզի 6 այլ համայնքներում ունեցանք վարակվածներ։
Սիրելի հայրենակիցներ, հարգեք մարդկային կյանքերը, մի խախտեք հակահամաճարակային կանոնները»,-գրել է վարչապետը:
Հիշեցնենք, արդեն տեւական ժամանակ է, ինչ փակ է նաեւ Գեղարքունիքի մարզի Սեւան քաղաքը՝ կորոնավիրուսով վարակվածների մեծ թվի պատճառով: