Ոստիկանության տարածքային ստորաբաժանումների ծառայողները շարունակում են բնակչության հետ բացատրական աշխատանք իրականացնել՝ ապօրինի զենք-զինամթերքի կամավոր հանձնման ուղղությամբ։
Մասնավորապես, Մասիսի բաժնում՝ գործարանային համարով «Կալաշնիկովի» ինքնաձիգի և փամփուշտների, Արարատի և Արտաշատի բաժիններում՝ ատրճանակների և փամփուշտների հանձնման դեպքեր են գրանցվել: Արդյունավետ էր նաև ոստիկանության Գեղարքունիքի մարզային վարչության ու Սևանի բաժնի ծառայողների բացատրական աշխատանքը։
Ոստիկանության Ախուրյանի բաժնի ծառայողների բացատրական աշխատանքի արդյունքում Ախուրյան գյուղի մի բնակիչ կամավոր հանձնել է «ՏՕԶ» տիպի հրացան ու տարբեր տրամաչափի փամփուշտներ։ Արդյունավետ էր նաև ոստիկանության Վաղարշապատի բաժնի ծառայողների բացատրական աշխատանքը։ Մուսալեռում բնակվող մի կին կամավոր հանձնել է Արցախյան ազատամարտում զոհված ամուսնու թմբուկավոր ատրճանակը, պայթուցիչով նռնակն ու փամփուշտներ։
Ոստիկանությունը հիշեցնում է, որ ապօրինի զենք-զինամթերքը կամավոր հանձնողներն ազատվում են քրեական պատասխանատվությունից։ Այս համատեքստում ոստիկանության ծառայողների բացատրական աշխատանքը շարունակվում է։
