ՀՀ ազգային անվտանգության ծառայությունը տեղեկացնում է, որ Սյունիքի մարզի Գորիս-Կապան միջպետական ավտոճանապարհի Որոտան-Դավիթ Բեկ հատվածում հայ և ադրբեջանցի սահմանապահների կողմից, ռուս գործընկերների հետ համագործակցությամբ, իրականացվում են սահմանապահ վերակարգերի տեղակայման աշխատանքներ:
Հիշյալ գործընթացն ավարտվելու է առաջիկա օրերին, և տվյալ ճանապարհահատվածում լիարժեքորեն ապահովվելու է բնականոն ու անվտանգ երթևեկության կազմակերպումը:
«Համապատասխան աշխատանքների ընթացքում անցանկալի միջադեպերից խուսափելու նպատակով քաղաքացիներին հորդորում ենք ցուցաբերել անհրաժեշտ զգոնություն, իսկ հնարավոր խնդիրների ու հարցերի դեպքում կապ հաստատել ՀՀ ազգային անվտանգության ծառայության սահմանապահ զորքերի թեժ գծի՝ 015 361893 հեռախոսահամարով»,- ասվում է ԱԱԾ հաղորդագրության մեջ:
Հայաստանի սահմանների ճշգրտման մասին քաղաքական գործիչների հայտարարությունների արդյունքում հանրության մեջ մոդայիկ դարձավ GPS բառը: Ի՞նչ է GPS-ը, որով ադրբեջանցի զինվորականները հայկական կողմից պահանջում են հետ քաշել պետական սահմանի որևէ հատված, զիջել հանքը կամ միջպետական ճանապարհներ: Ալեքսանդր Սահակյանը Կադաստրի կոմիտեում ի պաշտոնե զբաղված է պետական սահմանների սահմանազատման, այսինքն՝ հաստատված քարտեզների հիման վրա դաշտային պայմաններում այդ քարտեզների գծերը իրականացնելու աշխատանքով: Մինչև սահմանազատումը, սակայն, կա սահմանագծման փուլ:
Աշխարհում գոյություն ունի երկու հիմնական տեղորոշման համակարգ՝ ԱՄՆ պաշտպանության նախարարությանը պատկանող GPS-ը և Ռուսաստանի Glonass-ը: Ամերիկյան GPS-ն աշխատում է Երկրագնդի շուրջ տեղակայված 32, ռուսական Glonas-ը՝ 24 արբանյակների արձակած ռադիոալիքներով: Ընդունիչ սարքերը կարող են ավելի մեծ անհամապատասխանություն ունենալ, եթե ստանում են միայն մեկ տեղորոշման համակարգի տեղեկատվություն:
Ստացվում է, կարող են խնդիրներ լինել ոչ միայն տեղորոշման համակարգերի, այլև որպես հիմք ընդունվող քարտեզների առումով: Գեոմատիկայի կենտրոնը կատարում է մասնագիտական հաշվարկները։ Աստղաֆիզիկոս Կարեն Թոխաթյանը, որ ոտքով անցել է Արցախի ու Հայաստանի գրեթե ամբողջ սահմանամերձ տարածքներով, ասում է, որ GPS սարքով աշխատելուց առաջ պետք է ձեռքի տակ ունենալ երկկողմ համաձայնեցված քարտեզ՝ թղթի վրա կամ էլեկտրոնային տարբերակով:
Թե ինչու է Ադրբեջանի ներկայացրած քարտեզներում Հայաստանը միշտ հայտնվում զիջողի դերում, մասնագետները կապում են քարտեզագրման արևմտյան և ռուսական սկզբունքների հետ: Այն, ինչ գրված ու գծված է քարտեզում, պատկերվում է GPS սարքի էկրանին՝ ցույց տալով տեղորոշումը:
Քարտեզների համաձայնեցումից հետո միայն GPS սարքը ցույց կտա ճիշտ տեղորոշում, որը կբավարարի երկու կողմին: Տեխնիկական աշխատանքներից առաջ, սակայն, կա դիվանագիտական գործընթաց, որի արդյունքում կարող են շեղվել նաև խորհրդային կամ ամերիկյան քարտեզներից՝ կախված նրանից, թե կողմերն ինչպես են բանակցում տարածքները կիսելու համար: Ավելի մանրամասն "Լուրերի" ռեպորտաժում ստորև՝