Օպերատիվ-մարտավարական իրավիճակը հարաբերական լարված է, հակառակորդը փորձում է սադրիչ գործողություններ վարել՝ հայտարարել է ՀՀ ԶՈՒ օպերատիվ գլխավոր վարչության պետ-ԶՈՒ ԳՇ պետի տեղակալ, գեներալ-մայոր Էդվարդ Ասրյանը:
Նրա խոսքով՝ իրավիճակը լարված է եղել նաև Սև լիճ-Վերիշեն ուղղությամբ: Գիշերը լարվել է իրավիճակը նաև Կութ գյուղի ուղղությամբ: «Հակառակորդի ստորաբաժանումները փորձել են իրենց ուժերը միավորել: Հայկական կողմը, տեսնելով դա, փորձել է մեկ նոր դիրք ավելացնել, սակայն հակառակորդը տեսել է և շրջափակել, գերեվարել է 6 զինծառայողներին»,- ասել է նա:
Հարցին՝ ինչո՞ւ հայկական կողմը զենք չի կիրառել, պատասխանել է, որ ռազմաքաղաքական ղեկավարությունն իրավիճակը փորձում է հարթել առանց զենքի և ուժի կիրառման:
«Հակառակորդը պահանջ է ներկայացրել հետ քաշել հայկական ԶՈՒ ստորաբաժանումները, սակայն հայկական կողմը կանի դա, եթե վերադարձնեն գերեվարվածներին»,- ասել է նա:
