Ֆրանսիայի նախագահ Էմանուել Մակրոնը Բրյուսելում Հայաստանի և Ադրբեջանի ղեկավարների հետ եռակողմ հանդիպումից հետո գրառում է արել «Թվիթեր»-ի իր միկրոբլոգում՝ նշելով, որ Ֆրանսիան երբեք չի լքի հայերին:
Հանդիպման ավարտից հետո «Թվիթեր»-ում արված գրառման մեջ Մակրոնը մասնավորապես նշել է. «Մենք երբեք չենք լքի հայերին: Մենք մշտապես կփնտրենք լուծումներ տևական խաղաղության համար: Հորդորում եմ, որ տոնական այս շրջանը դառնա մարդասիրական առաջընթացի ու հաշտեցման շրջան»:
Նշենք նաև, որ Ֆրանսիայի սենատում Արցախի վերաբերյալ իրազեկման միջազգային խումբ է ստեղծվել: Այս մասին Ֆեյսբուքի իր էջում գրել է Արցախի Հանրապետության տարածքային կառավարման և ենթակառուցվածքների նախարար Հայկ Խանումյանը։
«Այս գաղափարի շուրջ սենատի մեծամասնության ղեկավար Բրունո Ռըտայոյի հետ զրուցել էի նոյեմբերին՝ Ֆրանսիա կատարած այցի ժամանակ։
Սենատորին շնորհակալություն էի հայտնել Արցախի Հանրապետության ճանաչման վերաբերյալ սենատի բանաձևը նախաձեռնելու համար և առաջարկել սենատում Արցախի վերաբերյալ պաշտոնական խումբ ստեղծել։
Ժամեր առաջ Բ․ Ռըտայոն Թվիթերի գրառմամբ տեղեկացրեց, որ նման խումբ արդեն գոյություն ունի։ Այս կարևոր իրադարձության առթիվ պետք է ընդգծենք Ֆրանսիայում Արցախի մշտական ներկայացուցչության աշխատանքի արդյունավետությունը»,- գրել է Խանումյանը: