«Լրագրողներ առանց սահմանների» միջազգային կազմակերպության հրապարակած մամուլի ազատության համաշխարհային ինդեքսում Հայաստանը բարելավել է իր դիրքերը՝ զբաղեցնելով 51-րդ հորիզոնականը 180 երկրների շարքում ։ Ինդեքսի տվյալների համաձայն, 2021 թվականին Հայաստանը գտնվում էր 63-րդ տեղում։ Տարածաշրջանային երկրներից Վրաստանը զբաղեցրել է 89-րդ հորիզոնականը, Ադրբեջանը՝ 154-րդ, Ռուսաստանը՝ 155-րդ, Իրանը՝ 178-րդ:
Նշվում է, որ Հայաստանի հիմնական լրատվական աղբյուրները սոցիալական ցանցերն են, որոնցից օրական օգտվում է բնակչության երկու երրորդը։ 2018 թվականի «թավշյա» հեղափոխությունից հետո մեդիա դաշտը նկատելի աճել է: Չնայած բազմակարծությանը, ըստ զեկույցի, այդուհանդերձ լրատվամիջոցները շարունակում են բևեռացված մնալ: Երկիրը առերեսվում է ապատեղեկատվության և ատելության խոսքի խնդրին։
Զեկույցում նշվում է, որ 2021 թվականը ծանր է եղել հայաստանյան ԶԼՄ-ների և լրագրողների համար՝ ղարաբաղյան պատերազմի, ընտրությունների և համաճարակի պատճառով:
«Լրագրողներ առանց սահմանների» միջազգային կազմակերպությունը հիմնադրվել է 1985 թվականին: Կազմակերպության առաքելությունն է ԶԼՄ-ների ազատություն, լրագրողների և օգտատերերի պաշտպանություն ամբողջ աշխարհում։ Այն պայքարում է գրաքննության դեմ և անազատության մեջ գտնվող այն լրագրողների ազատ արձակման համար, ովքեր ազատազրկվել են մասնագիտական գործունեության համար։ «Լրագրողներ առանց սահմանների կազմակերպություն»-ն իր կայքում ամեն տարի հրապարակում է աշխարհի երկրներում խոսքի ազատության ինդեքսը։
Մարդու իրավունքների պաշտպանի գրասենյակը իր տարեկան զեկույցում արձանագրել է նաև ցավալի դեպքեր, երբ լրագրողները տարբեր իրավիճակներում ենթարկվել են բռնության: Այս մասին լրագրողների հետ հանդիպման ժամանակ հայտնեց Մարդու իրավունքների պաշտպան Քրիստիննե Գրիգորյանը:
«Այս առումով մտահոգիչ է, որ մենք մայիսի 2-ին էլ ունեցանք նման դեպքեր, երբ մասնագիտական գործունեությունը իրականացնող լրագրողը ենթարկվել էր բռնության՝ հատկապես անվտանգության ոլորտում բարձրաստիճան պետական պաշտոնատար անձի կողմից: Սա խիստ մտահոգիչ է, և մենք հատուկ հայտարարությամբ անդրադարձել էինք այս դեպքին և հետևողական ենք լինելու, որ այս հարցում մեղավորներն անպատիժ չմնան»,-ասաց նա:
Պաշտպանը, անդրադառնալով գրասենյակի ստացած դիմում-բողոքների ուսումնասիրությանը, նշեց, որ ստացվել է տեղեկատվության ազատության իրավունքի խախտման վերաբերյալ 87 դիմում-բողոք: Շատ հաճախ այդ բողոքների ուսումնասիրությունը թույլ է տվել գալ այն եզրահանգմանը, որ շատ հաճախ պետական հաստատությունների կողմից տեղեկատվության հարցման պատասխանները տրվում են ժամկետների ուշացումներով, երբեմն նաև բովանդակազուրկ պատասխաններ են լինում:
Միաժամանակ Պաշտպանն ընդգծել է նաև լրատվամիջոցի կողմից ատելության ու անհանդուրժողականության հրահրման ու տարածման անթույլատրելիության մասին՝ որպես պատասխանատու և պրոֆեսիոնալ լրագրության սկզբունք։
«Չափազանց կարևոր է լրագրողների դերակատարությունը ատելության, բևեռացված և անհանդուրժողական խոսքի տարածումը կանխարգելելու, ինչպես նաև որևէ նյութի կամ հաղորդման ներքո ծավալվող քննարկումներում ծայրահեղ մեկնաբանությունները հեռացնելու համար»,- ասաց Քրիստիննե Գրիգորյանը:
Նա ընդգծեց, որ ամբողջ աշխարհում այս խնդիրը շատ արդիական է, պատասխանատու լրագրության տեսակետից ու անգամ վերնագրերերի ընտրության մեջ ոչ հետևողականությունը շատ դեպքերում կարող է ստվերել այն արժեքավոր նյութը, որը լրագրողը մեծ ջանասիրությամբ և պրոֆեսիոնալիզմով պատրաստել է:
