Հունվարի 25-ին Լոս Անջելեսում ՀՀ գլխավոր հյուպատոս, արտակարգ և լիազոր դեսպան Արմեն Բայբուրդյանը քննարկում է ունեցել Կալիֆորնիա նահանգի Ասամբլեայի անդամ Քրիս Հոլդենի հետ՝ Կալիֆորնիայի և Սյունիքի միջև համագործակցության հաստատման վերաբերյալ։
Զրույցի առանցքում էր Քրիս Հոլդենի հեղինակած Կալիֆորնիայի նահանգի և Սյունիքի մարզի միջև քույր-նահանգ/մարզ համագործակցություն հաստատելու վերաբերյալ բանաձևը, որը 2021թ․ սեպտեմբերի 2-ին հաստատվել է Կալիֆորնիայի Ասամբլեայում։
Ընթացակարգի համաձայն բանաձևը պետք է հաստատվի նաև Կալիֆորնիայի Սենատի կողմից։ Քանի որ նահանգային օրենսդիր մարմնի նստաշրջանը ավարտվեց 2021 թվականի սեպտեմբերի, այն վերսկսվել է այս տարվա հունվարին նոր նստաշրջանի մեկնարկով։ Բանաձևը նպատակ ունի արդյունավետ համագործակցության և երկուստեք գործընկերության հիմք ստեղծել ԱՄՆ Կալիֆորնիա նահանգի և ՀՀ Սյունիքի մարզի միջև։ Այն կոչված է խթանել կրթական, տնտեսական և մշակութային փոխանակման և այլ գործնական ծրագրերի իրականացումը։
Քրիս Հոլդենը Կալիֆորնիայի Ասամբլեայի անդամի պաշտոնում ընտրվել է 2014 թվականին։ Նա հանդիսանում է Կալիֆորնիայի հայկական օրենսդրական խմբակցության անդամ։ Քրիս Հոլդենը եղել է հայաշատ Փասադինայի քաղաքապետ։ Կալիֆորնիայի Ասամբլեայի Կոմունալ և էներգիայի հարցերով հանձնաժողովի նախագահն է։