Հայաստանի Հանրապետությունում հավատարմագրված մի խումբ դեսպանների հետ հանդիպման ընթացքում «Իմ քայլը» խմբակցության ղեկավար Լիլիթ Մակունցը ներկայացրել է վերջին օրերին ՀՀ տարածքային ամբողջականության եւ ինքնիշխանության դեմ ուղղված Ադրբեջանի քայլերը, Ադրբեջանի զինված ստորաբաժանումների կողմից իրականացվող դիվերսիոն գործողությունները, որոնք պետք է միջազգային հանրության կողմից արժանանան համարժեք արձագանքի։ Այս մասին հայտնեցին ԱԺ «Իմ քայլը» խմբակցությունից:
Լիլիթ Մակունցը շնորհակալություն է հայտնել հստակ դիրքորոշումների, ինչպես նաև որոշ դեսպանների կողմից վերջերս Սյունիք կատարած այցի և իրավիճակը տեղում գնահատելու պատրաստակամության համար։
«Թեև միջազգային հանրության կողմից հնչող կոչերին՝ Ադրբեջանը շարունակում է իր ապակառուցողական և սադրիչ պահվածքը՝ վտանգելով տարածաշրջանային փխրուն կայունությունը, ուստի մենք եւս մեկ անգամ դիմում ենք մեր միջազգային գործընկերներին ակտիվ միջամտության ակնկալիքով։ Ստեղծված իրավիճակի կայունացումն ու հանգուցալուծումը հնարավոր է միայն հստակ ջանքերի գործադրմամբ, որի հիմքում պետք է լինի ադրբեջանական ոտնձգությունների խստիվ դատապարտումը և կառուցողական դաշտ վերադարձնելը»,- ասել է Մակունցը։
Լիլիթ Մակունցը եւս մեկ անգամ շեշտել է, որ գերեվարված զինծառայողների վերադարձը և ադրբեջանական զինված ստորաբաժանումների հեռացումը Հայաստանի Հանրապետության տարածքից պետք է լինի անհապաղ ու առանց նախապայմանների։
