Գյումրիում կորոնավիրուսային հիվանդության երկու նոր օջախ է հայտնաբերվել, երկուսն էլ արտադրական ձեռնարկություններում՝ «Լենտեքս»-ում և «Սվետտեքս»-ում: Երկուսում էլ Հիվանդությունների վերահսկման եւ կանխարարգելման ազգային կենտրոնը (ՀՎԿԱԿ) կոնտակտավորների մեծ շրջանակ է առանձնացրել:
Խնդիրն, ըստ «Լենտեքս»-ի տնօրեն Կարեն Գոմցյանի, ընկերությունում չի ծագել: Գործարանում կատարվել են հակահամաճարակային բոլոր միջոցառումները, սահմանված կարգով և գրաֆիկով իրականացվել է նաև աշխատակիցների ջերմաչափում: Որևէ մեկն աշխատանքի ժամանակ ախտանիշ կամ ջերմություն չի ունեցել: «Բայց մարդիկ ինչ-որ պահի վատ են զգացել, սիմպտոմներ են հայտնաբերել իրենց մոտ, ինքանկամ գնացել են պոլիկլինիկա, նաև ասել են, թե որտեղ են աշխատում: Դրանից հետո արդեն համապատասխան մարմիններն եկան, մեզ էլ թեստավորեցին: Խնդիրը մեզնից չէր, բայց մարդիկ կարող են դրսից բերել վարակն ու տարածել»,- ՀԺ-ի հետ զրույցում ասաց «Լենտեքս» ընկերության տնօրեն Կարեն Գոմցյանը:
ՀՎԿԱԿ-ը «Լենտեքսում» 90 նմուշառում է իրականացրել, 24 աշխատակցի մոտ կորոնավիրուս է հաստատվել: Մյուսներին մեկուսացման ցուցում է տրված: Տնօրենը չի բացառում, որ մեկուսացվածների շրջանակում կլինեն նոր դրական դեպքեր: Ասաց՝ սպասողական վիճակ է: Այս ընկերությունում վարակակիրների հիմնական մասը փաթեթավորման և տեսակավորման արտադրամասի աշխատակիցներն են: Բայց այլ հատվածների աշխատակիցներ էլ կան, որոնք շփվել են միմյանց հետ:
Գոմցյանն ասաց իրենք այս պահին չեն աշխատում, մի քանի օրից կվերսկսեն աշխատանքը: «Մեզ չեն արգելել, ովքեր լավ են զգում և չեն շփվել վարակակիրների հետ, կգան, կաշխատեն»,- ՀԺ-ին փոխանցեց տօրենը:
Շիրակի մարզպետ Տիգրան Պետրոսյանի հետ զրույցում տեեղկացանք, որ ներկա պահին դադարեցված է «Սվետտեքս»-ի գործունեությունը, իսկ «Լենտեքս»-ի մասով դեռ վերջնական որոշում չկա: «Հարցը քննարկվում է»,- ասաց մարզպետը:
Կարեն Գոմցյանը մեզ հետ զրույցում մեկ խնդրի մասին խոսեց: Տեղեկացրեց, որ պոլիկլինիկաները չեն հասցնում սպասարկել տնային պայմաններում գտնվող կորոնավիրուսով հիվանդ քաղաքացիներին: Իրենց աշխատակցի օրինակը բերեց, որին այս պահին պատրաստվում են իրենց ուժերով բուժօգնություն ցուցաբերել:
«Մեր աշխատակիցն է, տանը պառկած, շատ բարձր ջերմություն ունի, բուժքույրը չի գնացել, որ սրսկի: Ինքն էլ շատ վատ վիճակում է: Հիմա մենք ենք կազմակերպում, որ մեր աշխատողներից ով կարող է սրսկել, տանենք, որ սրսկի: Պոլիկլինիկա են դիմել, էնտեղ ծանրաբեռնված են: Հիմա մենք պետք է մեր աշխատակիցներին օգնենք, համ սրսկելու հարցերը կարգավորենք, համ էլ դեղերը գնենք: Վիճակը լավ չէ»,-ասաց Գոմցյանը:
Ընդհանուր ռամամբ, հունիսի 9-ի ժամը 11.30-ի դրությամբ Գյումրու ինֆեկցիոն հիվանդանոցում կորոնավիրուսով 75 հիվանդ է բուժվում: Նրանցից 42-ը Շիրակի մարզի բնակիչ է։
Մարզում այս պահին տնային ինքնամեկուսացման ցուցում ունի 621 քաղաքացի: 93-ի մոտ դրական ախտորոշում կա՝ հիվանդության անախտանիշ ընթացքով: Վերջիններից հսկողությունն իրականացվում է առողջության առաջնային օղակի կողմից։
Մայիսի 12-ից հունիսի 8-ը ներառյալ Գյումրիում իրականացվել է 1252 նմուշառման հետազոտություն։ Համավարակի օրվանից մինչ այս պահը Շիրակում կորոնավիրուսից մահվան 10 դեպք է գրանցվել:
Հիվանդության հիմնական օջախները 2-ն են եղել՝ Անի խոշորացված համայնքի Մարալիկ բնակավայրն ու Գյումրին:
