Հանրապետության նախագահի լիազորությունները ստանձնած Ալեն Սիմոնյանը լրագրողների հետ ճեպազրույցում անդրադարձել է մամուլի հրապարակմանը, ըստ որի՝ թերի է ներկայացրել իր հայտարարագրերը՝ մասնակի թաքցնելով իրեն պատկանող անշարժ գույքի վերաբերյալ տեղեկությունը:
«Հաճախ երևի շտապում են ինձ հետ կապված հայտարարություն անել և լավ չեն ուսումնասիրում: Նշված գույքը 2012-2015-ին կոմունալ փոքր բնակարան էր՝ տատիկիս բնակարանը: Այն վաղուց վաճառվել է, որևէ նշելու բան չի եղել, երբ ես պաշտոնյա էի: Հիմա էլ չկա, ապագայում էլ չի լինելու: Պաշտոնապես հայտարարում եմ, կարող են նորից ստուգել: Արդեն քննարկել եմ փաստաբանների հետ, կդիմեմ դատարան, հերքում կպահանջեմ»,- ասաց Սիմոնյանը:
Հանրապետության նախագահի լիազորությունները ստանձնած Ալեն Սիմոնյանն ԱԺ-ում լրագրողների հետ ճեպազրույցում հայտնեց, որ նախագահի պաշտոնում քննարկվել է նաև իր թեկնածությունը, սակայն ինքն ինքնաբացարկ է հայտնել:
Սիմոնյանի խոսքով՝ նման քայլի պատճառները շատ են:
«Համարում եմ, որ Ազգային ժողովում աշխատանքը բավականին լավ եմ կատարում, համարում եմ, որ պատասխանատու աշխատանք եմ կատարում: Շատ-շատ պատճառներ կան, գուցե նաև ես այն ճանապարհը դեռ չեմ անցել, որ պարոն Խաչատուրյանն է անցել: Երկրին պետք է պատասխանատու ձևով մոտենալ, և այդ պատասխանատվության զգացումը շատ բարձր է: Դա նույնպես դեր խաղաց իմ որոշման հարցում»,- ասաց Սիմոնյանը:
Սիմոնյանը նշեց, որ Խաչատուրյանից բացի այլ արժանի թեկնածուներ ևս եղել են:
«Նաև կին թեկնածու է եղել: Թե ով է՝ չեմ ասի»,- ասաց նա:
ՀՀ նախագահի լիազորություններն իրականացնող Ալեն Սիմոնյանին այսօր լրագրողները հարց են ուղղել, թե ինչու է իշխող ուժը նախագահի պաշտոնում առաջադրել Վահագն Խաչատուրյանի թեկնածությունը, և արդյոք այլ թեկնածուների հարց ևս քննարկվել է:
«Քննարկվել են այլ թեկնածուներ ևս: Շատ երկար է եղել քննարկումը, և շատ տարբեր փաստարկներ են բերվել: Երկար քննարկումներից հետո այդ որոշումը կայացրինք: Դժվար է երկու բառով ասել, թե ինչու հենց նրան: Ես անձամբ գտնում եմ, որ շատ լավ թեկնածու ենք ընտրել, որն իր անցած ճանապարհով, իր պարկեշտությամբ շատ համապատասխան է, բավականին լավ կիրականացնի այն պարտականությունները, որ նախատեսվում են: Պարոն Խաչատուրյանի թեկնածությունն առաջադրվել է մի քանի հոգու կողմից»,- ասաց Սիմոնյանը:
