«Հայ հեղափոխական դաշնակցություն» կուսակցության երիտասարդ անդամները Կառավարության շենքի դիմաց իրազեկման, միևնույն ժամանակ բողոքի ակցիա են իրականացրել: Երիտասարդները ներկայացրին իրենց հուզող հարցերը և, թե վերջին տարիներին կատարված փոփոխություններից ինչն է իրենց հուզում ու մտահոգում: Այս ամենից հետո Կառավարության դիմաց լարված իրավիճակ ստեղծվեց, ոստիկանները սկսեցին բերման ենթարկել ակցիայի մասնակիցներին: Քանի որ երիտասարդները իրենց հետ բերած իրերը գետնին էին լցրել, ոստիկանները հայտնեցին, որ իրենք աղտոտել են տարածքը, այդ պատճառով նրանց բերման ենթարկեցին: Նրանց թվում էր նաև «Հայաստան» դաշինքի պատգամավորի թեկնածու Արգիշտի Գևորգյանը:
Երիտասարդների մի մասը փակեց դեպի Նալբանդյան փողոց տանող խաչմերուկը, իսկ ոստիկանները հորդորեցին նրանց բացել ճանապարհը և չխանգարել տրանսպորտային միջոցների երթևեկությանը, հակառակ դեպքում կկիրառվեն օրենսդրությամբ սահմանված հարկադրանքի միջոցներ: Ոստիկանները մի քանի րոպե հետո սկսեց բերման ենթարկել նաև փողոցը փակածներին:
«Ոստիկանության զորքերի ծառայողները նախապատրաստվեցին, այնուհետև հնչեց վերջին նախազգուշացումը և ոստիկանները ձեռնարկեցին համապատասխան գործողություններ: Անհամաչափ ուժ չի կիրառվել, ֆիզիկական ուժ է գործադրվել»,- նշեց ոստիկանության մայորը:
ՀՅԴ երիտասարդական թևից մեկը շեշտեց, որ իրենք ընդամենը ակցիա են իրականացրել և իրենց մտահոգող հարցերը բարձրաձայնել: Այժմ նրանք պատրաստվում են գնալ ոստիկանական բաժանմունքներ՝ հասկանալու համար, թե ինչպե՞ս և որտե՞ղ են բերման ենթարկված իրենց ընկերները:
ՀՀ կառավարության շենքի դիմաց իրազեկման և բողոքի ակցիա իրականացնող Հայ հեղափոխական դաշնակցության երիտասարդական թևի անդամներից 16-ը բերվել են ոստիկանություն: «Արմենպրես»-ի հետ զրույցում այս մասին ասացին ՀՀ ոստիկանության հասարակայնության հետ կապերի և լրատվության վարչությունից:
«Նրանք ոստիկանություն են բերվել վարչական իրավախախտումների վերաբերյալ օրենսգրքի 182-րդ հոդվածով (Զինծառայողների կամ ոստիկանության ծառայողի օրինական պահանջը չկատարելը) նախատեսված արարքներ կատարելու համար»,- նշեցին ոստիկանությունից: