2021 թվականի մայսիսի 12-ից սկսած ադրբեջանական ուժերը ներխուժել են Հայաստանի ինքնիշխան տարածք եւ դրա արդյունքում փաստացի օկուպացրել 41 քառ. կմ տարածք: Երեկ՝ նոյեմբերի 16-ին, նույնպես ադրբեջանական ուժերը փաստացի ագրեսիա են իրականացրել մեր նկատմամաբ:
Այս մասին այսօր Կառավարություն - ԱԺ հարցուպատասխանի ժամանակ խոսեց «Քաղաքացիական պայմանագիր» խմբակցության պատգամավոր Վահագն Ալեքսանյանը: Ապա պատգամավորը ՀՀ վարչապետ Նիկոլ Փաշինյանին խնդրեց մեկնաբանել, թե այս պահին ի՞նչ իրավիճակ է մեր սահմաններում:
«Նախ, 41 քառակուսի կիլոմետր տարածքի վերաբերյալ. այդ թիվը չի ձեւավորվել երեկվա, կա՛մ նախորդ օրվա գործողությունների արդյունքում: Երեկվա գործողությունների հետեւանքով այս բալանսը որեւէ ձեւով չի փոխվել: Ուզում եմ նաեւ ընդգծել, որ այնպես էլ չէ, որ այդ 41 քառ. կիլոմետրն ամբողջությամբ եւ լիարժեք վերահսկվում է ադրբեջանական զինված ուժերի կողմից: Մայիսի 12-ին տեղի ունեցած գործողությունների հետեւանքով թե՛ մեր, թե՛ ադրբեջանի զինված ուժերի դիրքերը շախմատաձեւ են դասավորված, տեղ-տեղ նաեւ մխրճված մեկը մյուսի մեջ՝ անտրամաբանական ձեւերով: Մանավանդ հիմա շատ կարեւոր է, որ մենք դաշտը լավ եւ հստակ պատկերացնենք»,-շեշտեց վարչապետը:
Փաշինյանը նաեւ ընդգծեց՝ մայիսի 12-ց առաջ էլ շուրջ 40 եւ ավելի քառակուսի տարածք եղել է ադրբեջանի վերահսկողության ներքո. առաջին պատերազմի հետեւանքներով: «Պետք է ասել, որ առաջին պատերազմի արդյունքներով նաեւ սովետական Ադրբեջանի տարածքներ կան, որոնք գտնվել են եւ գտնվում են Հայաստանի վերահսկողության ներքո: Ըստ էության այս հանգամանքների բերումով է, որ կարեւորում է սահամանզատման եւ սահմանագծման գործընթացը»,-հավելեց նա:
Միջազգային հանրությունը ե՛ւ Ադրբեջանին ե՛ւ մեզ կոչ է անում սկսել սահամանզատման եւ սահմանագծման գործընթաց եւ կողմնորոշվել ի՞նչ մեթոդաբանությամբ է տեղի ունենալու, որպեսզի այս հարցը մեկնընդմիշտ փորձենք փակել:
Անդրադառնալով երեկվա ռազմական ագրեսիայի հետեւանքվ դիրքային կորուստների մասին հարցին, վարչապետն ասաց. «Կան ներխուժված հատվածներ, որտեղ ե՛ւ մենք, ե՛ւ Ադրբեջանը ունենք դիրքեր: Նախկինում էլ ունեինք, հիմա էլ: Այս ընթացքում այդ դիրքերի բաշխվածութունը անընդհատ փոխվում է: Այդ 41 քառ. կիլոմետրի մեջ երեկվա գործողությունների արդյունքում որեւէ բան չի փոխվել»: